Lil Nas X nena an sak dun, Industry Baby pawhin rimawi khawvela tehna rintlak ber pakhat, Billboard lama dinhmun sang tak hauh mektu, Jack Harlow tia hriat, Jackman Thomas Harlow hi March 13, 1998-a Shelbyville, Kentucky-a piang a ni.

American rapper leh zaithiam, Harlow hi a nu chu Maggie Harlow niin sumdawng a ni a, a pa, Brian Harlow ve thung hi sakawr vulha ei zawng a ni a. Thlahtu lam chhuinaah chuan French leh Irish lam pawl a ni.

Harlow hian kum 12 mi lek a nih lai atang tawhin rap ti a titan tawh a. Hetih lai hian an chhungkua hi Shelbyville atangin khawpui lian zawk, Louisville-ah an pem a. A thianpa, Copeland nen Guitar Hero microphone leh laptop hmangin an thiam ang angin rhyme leh hla an record ve nawk bawk thin.

An thian dun hian CD pakhat, ‘Rippin’ and Rappin’’ tih chu tichhuak a, hei hi an sikul, Highland Middle School-ah an zuar ve lawp lawp thin nghe nghe.

Pawl sarih a zir laiin Harlow hian professional microphone a nei thei ta a, a mixtape hmasa ber, Extra Credit chu a puitlin zui ta bawk a, hei hi ‘Mr. Harlow’ a ti a. A \hiante nen bawk group ang deuh pakhat, ‘Moose Gang’ tia invuah chu an din bawk a, hetih lai hian mixtape pahnih a buaipui a; mahse, a hlawhtlinpui ta lo va, hei hi ‘Moose Gang’ leh ‘Music for the Deaf’ tih a ni.

November, 2015 khan Harlow hian a EP puitling hmasa ber, ‘The Handsome Harlow’ chu a tichhuak ta a. Gill Holland-a sonaBLAST! record label atanga tihchhuah a ni a. High school a kal chhung zawng Louisville-a hmun hrang hrang - Mercury Ballroom, Headliners leh Haymarket Whiskey Bar-ah te a EP thehlar hian a zai ve lawp lawp \hin.

Tun dinhmunah hian Don Cannon leh DJ Drama te record label, Generation Now nen contract an nei mek a, hei hi Atlantic Records hnuaia mi a ni a. Rimawi tichhuak thin, ‘Private Garden’ tih dintu zinga mi a ni ve bawk.

Hriat a hlawh tanna tak chu kum 2020-a single-a a tihchhuah, ‘Whats Poppin’ tih kha niin US Billboard Hot 100-ah No. 8 a kai phak hial a. A album hmasa ber, ‘Thats What They All Say’ chu December 11, 2020 khan a tichhuak zui a, hei pawh hi US Billboard 200-ah No. 5 a kai phak bawk a ni.

March 27, 2021 khan Harlow hi Saturday Night Live 46th season-ah a inlan a. Hetah hian ‘Tyler Herro’ leh ‘Whats Poppin’ a sa a, a dawtah Adam Levine nen ‘Same Guy’ an sa bawk.

July 23, 2021 khan Lil Nas X-a single ‘Industry Baby’ chu tichhuakin music video-ah pawh a lang bawk a, an hlawtling zui mek.