DOWNLOAD OUR APP

Read latest news on your phone
app-store

Jadon Sancho-a’n United a zawm; J no. 25 a ha dawn

Jul 24, 2021

United-ah hian veteran striker Edison Cavani chuan number 7 a ha chhunzawm ang

Hun rei tak an rim hnuah Red Devils chuan an mi duh tak, english tlangval kum 21 Jadon Sancho chu Ole Gunnar Solskjaer-a hnuaia khel turin kum 5 chhung atan contract ziakin an la lut fel. Manchester United-ah hian Sancho hian jersey number 25 a ha ang. A club hlui Dortmunt lama a hak thin jersey number 7 chu a chang dawn ta lo a ni. United-ah hian veteran striker Edison Cavani chuan number 7 a ha chhunzawm rih ang.

Manchester United hian winger cherang leh ball thiam la lalut tur hian Borussia Dortmund lamah £73 million an seng a, England international, Euro 2020 final-a Three Lions tana penalty hlah tu Sancho hi tun nipui transfer chhunga Ole Gunnar Solskjaer hnuaia mi thar inziak lut hmasa ber a ni. 

Sancho hian Old Trafford tlar hma lamah Marcus Rashford, Edinson Cavani, Mason Greenwood leh Anthony Martial te a zawm dawn a, kar khatah euro 350,000 hlawhin United player hlawh hnem ber pahnihna a ni ang. 

Lei chhuah tumin kum khat dawn United lam hian Sancho hi an rim tawh a, a man chungchangah an inrem mai thei lo. Tun thla tir lam khan right-winger la tur hian Dortmund nen inhrethiam tawn takin pound maktaduai 73-in an in rem thei ta a ni. He inremna hian thil dang ken tel a nei hran lova, kum khat dang contract hi pawhsei belh thei a ni thung ang.  Dortmund lam hian ui viau mahse, amah berin Premier League lama khelh a chak tlat vangin July ni 1 khan CEO Hans-Joachim Watzke chuan an chelh theih ngang loh thu a sawi nghe nghe. 

Enge an sawi
Sancho-a'n thuchhuah a siam-ah chuan,"First team-a khel phak tura hun tha min siam thintu Dortmund chungah khan ka lawmin nuam ka ti thin takzet, chutihrualin engtik niah emaw chuan England lamah hian ka la khelh ngei ka ring tlat thin a ni. Tunah ka suangtuah ram, ka lo thlir thin Manchester United lama luhna hun tha ka nei hi ka lawm takzet a, Premier League lama inlan tur hian ka nghak thei tawh tlawt lo a ni. Kum lama naupang tak tak awmna team a ni a, hlawhtlinna lal lukhum khum turin thil ropui kan tiho thei ngeiin ka ring. Chu chu fans lam pawhin an phu hle a ni. Hmasawn zel turin manager leh coaching staff te tha taka thawhhopui ka tum ang," tiin Sancho hian a sawi.  

A player thar chungchang sawiin Ole chuan,"Player theihna sang tak nei Sancho-a kan chang thei hi ka lawm a, club-in kan tangkaipui hle ang. Goal thun thei leh mi siam saktu a nih vangin kan team tana player pawimawh leh squad ti chhak tur mi pawimawh tak a ni. A theihna sang ber lan chhuah tir turin Old Trafford hian a pui dawn a ni," a ti.

Dortmund tan season 4 chhungin game 137-ah inlanin goal 50 leh assist 64 a nei thei a ni. 

Share now