September 21, 2022; Mizoramah mitang (prisoner) 1,386 awm theihna Jail 10 a awm a, hetihlai hian Jail thenkhatah chuan mitang awm thei zat (capacity) aia tam tang an awm reng a ni. Tun dinhmunah damchhung tang tura thiamloh chantir (convict) tawh mi 49 an awm a, chung zinga pakhat chu hmeichhia a ni.

Prison department tarlan danin, September ni 14, 2022 thleng khan Central Jail, Aizawl ah mitang 726 awmin, tang awm thei zat erawh 438 a ni. Central Jail, Aizawl ah hian damchhung tang tura thiamloh chantir tawh mi 48 (mipa vek) awmin, Central Womens Jail ah damchhung tang tura thiamloh chantir tawh hmeichhe pakhat nen, an vaiin mitang 147 an awm a, tang awm thei zat erawh 96 a ni. 

Mitang 109 awm theihna, District Jail, Lunglei ah tang 119 awm mekin, tang 92 awm theihna, District Jail, Siaha ah tang 63 an awm. Tang 105 awm theihna, District Jail, Champhai ah mi 140 awm mek bawkin, mi 134 awm theihna, District Jail, Kolasib ah tang 96 an awm bawk. 

Mi 98 awm theihna, District Jail, Lawngtlai ah tang 37 awm mek bawkin, mi 128 awm theihna, District Jail, Serchhip ah tang 50 an awm a, mi 96 awm theihna, District Jail, Mamit ah mitang 56 an awm mek bawk.