Aizawl February 26, 2024 : Vawiin khan District Legal Services Authority, Siaha District -te chuan jail tang ten jail an chhuah hnua hna an neih theihna tur atana hmalakna, ‘Skill Development for Prisoner’ hawnna hun an hmang.

Lalhriatpuii Secretary, District Legal Services Authority -cum- Chief Judicial Magistrate, Siaha District, Siaha chuan he Skill Development programme hi District Jail, Siaha a vawikhat neihna tur a ni, a ti. He programme atan hian trade 4 thlan niin - Arts, Handicraft, Barber leh Electric Wiring- te an ni a. Zirtirtu tur atan hian Jail Staff, tang convict tawh leh pawnlam mi te thlan an ni a ti. Skill Development for Prisoner’ programme- in a tum ber chu 'jail' tang te 'jail' atanga an chhuah hnua an mahni ke a an din theihna tura thiamna pek a nih thu a sawi.

Khuallian Lalngaihmawia Zote, Judge, Fast Track Court -cum - Additional District and Sessions Judge, Siaha District - chuan District Legal Services Authority- in hetiang program an buatsaih chu tha a tih thu a sawi a. Jail -tang ten an tui zawng zawngte zir a, thiamna leh eizawnna tlak tak tak zir thiam tur a duhsakna hlanin fuihna thu a sawi a. Hlawhtlinna hi eng dinhmun atang pawha neih theih a nih thu tarlangin , Jail -tang ten he programme hi tangkai taka hmang a, hlawkna an chhar chhuah vek theih nan duhsakna a hlan bawk a ni.