James Lalramliana chanchin thangva a lar em em mai chu sakei nen a an chungchang hi a ni a. A lehkhabu ziah chu ‘Thlarau Thianghlim ka sawifiah nan sakei min pe’ tih ani a. A thuziak phek 90-na leh phek 91-naah chuan hetiang hian ziak a ni a. Phek 90 tawp lamah chuan James-a Pathian chuan James-a hnenah, “Sakei fuke zawng zawng hi ka siam a ni a, keimah ka ni,” ati a. Hetiang avang hian James-a chuan “Sakei ke te, a lu te, a taksa peng chitin mai chu, Lalpa ang hiala ngaihna ka nei ta a ni,” tiin a ziak. Phek 91-na paragraph hnihnaah chuan, “Kha sakei leh a lu kha keimah ka ni a, a beng pahnihte kha keimah ka ni a, a mit var takte pawh kha keimah ka ni a, a ka leh a ha leh a lei chak tak te kha keimah ka ni. Tin, a ke te, a mei te, a taksa te chu keimah vek a ni. Tiang hian sakei chanchin chu James-a Pathian chuan a sawi zel a, ”He sakei hi nun thianghlim a ni a, ka thupek loh chuan chaw a zawng ngai lo va, ka thupek loh chuan tui a in ngai lo va, ka thupek loh chuan zan pawh a mu ngai lo, ka thupek loh chuan a pum chhunga thil awm pawh a paih chhuak ngai hek lo. Ka tel lo chuan a chakna pawh a hmang ngai lo,” tih thu tarlan a ni. Hetiang sakei thianghlim, a tette atanga control-tu awm tlat hi khawvelah piangin a rin awm tlat lo, James-a hnena a awm thin hnu lamah pawh Mizoramah a awm pawh a rinawm loh, RAMHUAI inlarna chi khat mai niin a lang. Phek 112-naah chuan James-a chu a Pathian chuan tuichhunga nungchate hnena hmangaihna hrilh tura a tih avanga hrilh a tum thu leh nungchate chuan amah an pan thu leh chakaiho chu a phur bera an tan thu leh sawm leh pahnihte chu a ke bula an awm thu tarlan a ni a. James-a lehkhabu phek 113-na tawp lamah chuan hetiang hian ziak a ni a: Rannung hnenah darkar li vel thu a sawi hnuah chuan a Pathian leh a thianpa ni bawk sakei chuan chhak lam atang chuan dimna awm hauh lovin sangha te, chakai te, kaikuangte chu a rawn tum chat mai a, a then an him a, a then a tum hlum bawk a, James-a chu a thin a rim ta hle mai a, a lalpa hnenah chuan a ang ta chiam mai a ni. Pathian dik tak hre chiangtu Joba chuan a fate zawng zawng leh a thil neih zawng zawng a chan bakah thih mai hmabakin na tak tuarin a awm a, Pathian chunga lungni lovin a awm reng reng lo, hetiang tak hian tuar mah sela Pathian thinur khum ngam chiah a ngai lo. Tirhkoh Paula te pawh hian namen lovin Lal Isua avangin an tuar a, tuar nasa hle mah sela “Engkimah lungawi zel ka ching tawh,” an ti mai a ni. Phek 114-naah chuan hetiang hian a sawi a, ”Lalpa tunah chuan ka thin a rim em em a ni. Niminah i fapa Lal Isua Krista hmingin heng tui chhunga awm te hi ka ko khawm a, an awm khawma i thu ka hrilh tui lai takin sakei mawl lutuk kha alo thlenga dimna tel hauh lovin min lo tum darhsak vek a. Chuvangin, khi sakei khi ka hua a ni. Engvangin nge khatia rawn ti ringawt nge a nih a, a chhan min hrilh rawh, ka ti a. Ka tawngtai chu tlai ni tlak thlengin ka tho lo,” a ti a. He a thuziaka hian James-a Pathian chuan sakei khan a thu lo chuan engmah a tih loh thu a lo hrilh tawh a. Mahse, sakei thu kha a Pathian thuah a ngai lo reng reng nge a Pathian chungah pawh khan a lungni lo zawk ni ang? James-a chuan Pathian hnenah sakei chuan Pathian thu lo chuan engmah a ti lo tih hre reng chung siin sakeiin rannung a chilhlum chhan zawtin, a kete chu thi ang mai a, zeng khaw lo tawh a nih thlengin a Pathian a kar a, a Pathian a karna lamah chuan a duh ber chu kawrte tui rawn lian sela, thih mai hmabakin awm sela Lalpa chu alo che ngei ang a, chutah chuan sakeiin rannung a chil hlum chhan chu ka zawt ang a ti a, a karna tina hle mah se a Pathian chuan a chhang duh lo. Pathian chuan a duh ang angin min kaihruai thin, a chhan hre turin Pathian kan kar tlut tlut tur a ni lo. Josefa khan Pathianin a chunga a thil tih tum kawngah harsatna tam tak a tawhtir a, Pathian hnenah, “Lalpa eng vangin nge ka u-te’n Israel khualzin hnenah min hralh mai ni?” tiin Pathian a kar kan hre lo. Potiphar-a nupui laka a hmingchhiatna te, tan ina khunga a awm chhante Josefa’n Pathian hnenah karfung lian tak hmanga a kar thu kan hre reng reng lo. Pathianin min kaihhruai a tum dan min hrilh hriat nghal vek pawh hi a thil tum a ni lo. Phek 116-naah chuan James-a chuan a Pathian hnenah chuan, “Ka duh ber chu rannung Lal Isua chanchin ka hrilh lai a, sakeiin a rawn ben hlum chhan kha a ni. Min hrilh loh chuan pawl pawh min pawl tawh suh, thil dang engmah hriat ka duh lo, ka titlat a ni,” a ti a. James-a Pathian ni lo kan PATHIAN hi chu hetianga kar mai mai chi a ni lo. Engkim siamtu lei leh vana thuneitu a ni miau a, ringtute kan nih dan tur chu kan chungah engpawh thleng sela Mari’n a tih angin, “Lalpa bawih nu ka ni a, i thu ang zelin ka chungah thleng rawh se,” tih mai hi kan nihna tur a ni. Phek 116-na laihawlah chuan hetiang hian ziak a ni a, a tawngtai fat fat lai chuan a Pathian aw dik tak chuan a thinlungah thei kha ei rawh, i taksa i mal leh i ke zawng zawng kha a dam vek ang a rawn ti a. A sermon-ah chuan pathian aw dik tak chu chhan loh ngam a nilo ti pang pang si, tihian a Pathian chu a chhang a. ‘Min hrilh tawh rawh min hrilh loh chuan ka ei lo vang’ ka ti a, tih thu tarlan a ni a. James-an Pathian tak tak dawr nan chuan thill tha lo tak keini thil siam mai maiin, kan duh ang anga Pathian hi kan khalh kawi theih a ni lo. James-an a Pathian a dawnsawn dan hi chu naupang khawlo deuhin a nu leh pate control beh tlat tum ang chauh a ni. James-a chuan Pathian chu na takin a kar a, sakei a Pathian thu thu a awm thin, a thu lo chuan engmah ti ngai lo, chutiang a nih chuan a rannungho Pathian thu a hrilh mek a tihhlumsak pawh kha James-a Pathian tirh niawm tak a ni a, a thuziakah chuan a Pathian leh sakei kha pa leh fapa ang main a ziak si a, Lal Isuan pa thu lo chuan engmah a tih loh thu a sawi a. James-a Pathian pawh khan a thu lo chuan sakei khan engmah a tih loh thu a sawi bawk si a,a thu ziak kalphung nen inpersan tak ani. Phek 119-na tawp lamah chuan hetiang hian a ziak , ”Ka chau tial tial a, mahsela thawh sawn chu ka tum chuanglo. Tlai lam a lo nih chuan Pathian aw chu ka hre ta a. Tunah hian inthing harh la, a chhan hre turin ka lamah beng chhi rawh min ti a. Ani chuan thikthuchhia Pathian, mi kanral hmang Pathian ka ni tih zawng chu a rawn sawi a,” tih thu ziak a ni a, a Pathian chhanna chungchanga a dah pawimawh em em mai chu hei hi a ni; Phek 119-naah chuan hetiang hian a ziak a. “Heta Pathianin a ngaih pawimawh em em mai chu hei hi a ni a, Mizorama Pathian ringtu intite hi kan fing tawh lutuk a, Pathian hnenah thil kan dil a, kan dil hi min pe dawn nge dawn lo pawh hre miah lovin lawmthu kan sawi hnan hmiah hmiah mai a,” tih thu hi a ni a. Chanmari-a rawng a bawl naa damna inkhawmah chuan hmang nasa ber a ni lawi si a, a thuziak leh sermon hi belhchian zawh poh leh a chiangkuang lo mai a ni. A lehkhabu ziak thupuiah “Thlarau Thianghlim ka sawi fiah theih nan sakei min pe,” a ti a, chakai te, kaikuang te, sangha te hnenah Pathian thu hrilh turin a ti a, a hrilh tui lai takin, Thlarau Thianghlim a sawifiah theih nan a Pathianin sakei a pek ngei chuan a tihhlumsak a, lungni ta lo em em a, thi chhawngin a Pathian a awmzia a zawtin a kar a. Namen lova a tawrh hnu chuan tui chhunga rannung thu hrilh tura tirtu a Pathian ngei chuan a chhan leh vang a chhanna chu “Thikthuchhia, Pathian mi kan ral hmang Pathian ka ni,” tih hi a ni a. James-a Pathian leh a Pathian pakhat sakei chuan James-an rannung darkar li zet Pathian thu alo hrilh chu an lo thik dun viau niawm tak a ni. A THU LEH HLA HI A VA HAN LAKTLAK LOH TAK EM! James Lalramlianan Pathian hnenah ngaihdam a dil: James-a hian ngaihdam a dilna chhan hi ziakin a tarlang lo va, ngaihdam a dil dan kawng erawh hi chu milem be ho taksa intihhreawm avanga Pathianin khawngaih tura ngai tlatho hmalakna erawh chu a ang hle a ni. Tiang hian a ziak a, “La tlan ngat ngat ang a, ka chauh deuh hnuah ka chawl ang a, ka hahdam leh hunah ka tlan leh zel anga chaw ei tur ka nei si lova ka ril a tam hunah ka chawl ang a, ka tawngtai chauh ang, ka ti rilru a. Hetiang rilru ka put chhan chu Pathianin Ekhai a ni hi chu a chau tawh em mai chhang vat ila haw leh vat sela a tha ang a tih ka beisei a ni a ti a. Tichuan, ka hah hunah ka chawl a ka hahdam hnuah ka tlan leh thin a. Ka duhthusam ang ngeiin ka ril a lo tam ta ngei a, ka ril a lo tam ta ngei a, ka riltam ka inhriatchhuah chuan dar 8:30 vel a ni a, thim pawh a thim tawh hle a, Thangpik tak zingah chuan ka lut a, mutna ka phah a, thosi hian min vir vut vut ni berin ka hria, tahchuan ka tawngtai tlaivar ta a, thosi leh vaihmite chu an tam ngang mai a min seh pawhin seh lo ang maiin ka tawngtai ta ngat ngat mai a, zan thum leh ni thum chawl miah lovin ka tawngtai chhunzawm char char a.” Hetiang taka ngaihdam a dil pawh hian a Pathian chuan a chhang duh reng reng lo. “Chutiang avang chuan a thinrim ta hle mai a, a thinrim lutuk chu phaisen luiah chuan a vak thla a, ka awm chin chu tuiin a chim theih nan ka zuang thla, ka lu chuan lung ka lukham a, lung chu ka awm ah chuan ka dah a,tichuan lalpa hnenah ngaihdam ka dil tlaivar leh,” tih ziak a ni a. Mahsela engmah chhanna a hmu lo. Tui chhungah ni khat leh zan khat inhnim chunga ngaihdam a dil pawhin chhanna reng reng a hmu thei lo. Mak em em mai chu a sual ngaihdam ni miah si lo, Pathianin darkar 7 te, darkar 8 te a pawl a, amah nen a lengdun thin anga a sawi hi a ni. Phek 135-na tawp lamah chuan hetiang hian a ziak a, ”Tun tuma min lak hian darkar 9 leh darkar 10 vel a ni ang,” tiin a ziak a. Heti chung hian ngaihdamna thu engmah a sawi duh loh avangin a thinrim em em a, a Pathian hnenah chuan, “Min hruai tawh suh ka ti che a, engah nge min hruai ziah ka thinlung a na a ni ka ti a. Ka tawngtai chu ka ang a ni ber mai,” amah pawn a ti hial a ni. James-a Pathian hi mak tak a ni a, darkar 10 dawn dawn pawh pawl duh si a sual a ngaihdamsak duh lo tawp mai kha chu mak tak a ni. James-a pawh hi khatiang khawpa Pathian nena lengdun si vuivai reng reng a awm a. Pathian laka thinrim em em thei hi a ni. James-a chu a Pathian chuan a ngaidam ta a, a hnena a ngaihdamna thu a sawi chu hei hi a ni. Sam 143:1-2 hi rawn la chhuakin Davidan Pathian tanpui ngenna thu hi rawn hmangin, “Aw Lalpa ka tawngtaina hi ngaithla la, khawngaih ka dil naah hian beng lo chhi la, i rinawmna avang leh i felna avangin min chhang ang che. I chhiahhlawh chungah hian rorel suh ang che. I mithmuhah chuan minung reng reng thiam chang an awm si lo,” tih a ni. James-a chuan a Pathian ngaidam turin namen lovin a kar a, a tawpah chuan a Pathian chuan a tanpui a lo ngen ta hlauh zawk. James-a hnenah chuan, “Aw Lalpa, ka tawngtaina hi lo ngaithla la, khawngaih ka dilna ah hian beng lo chhi la, i rinawmna avang leh i felna avangin min chhang ang che,” tiin a Pathian hnenah chuan a tanpui a lo dil let then mai a ni. James-a hi a lo ropui khawp mai a lo ni.