India hmar lam, Jammu-a lui kawr ruama bus tlan liamah a chuang mi 36 vel an thi a, mi dang 19-in hliam an tuar bawk.

Thuneitute chuan Doda district-a chesual bus-ah hian mi 50 chuang chuangin kawng atangin a thlang feet 300 vela thuk kawr ruamah a tla niin an sawi.

Chetsualna thlen chhan hi an la hre lo.

Prime Minister Narendra Modi chuan chhiatna thleng pawi a tih thu leh thi chhungte chu zangnadawmna pek an nih tur thu a sawi.

Thlalak leh video thehdarhah chuan bus hi sawp chhe takin tlang bawk bulah a awm a, chhanchhuah hna thawktuten dam chhuakte an zawng mek.

Union Minister Jitendra Singh chuan thuneituten hliam tuarte tan ‘tih theih ang zawng zawng’ an ti tih a sawi a, a bul hnai damdawi in hrang hrangah an dah lut tih X-ah a tar lang.

Hliam zinga mi paruk hi an na zual niin a sawi a, helicopter hmanga phurh turin ruahmanna siam nghal a ni tih a sawi bawk.

India-ah hian lirthei chesual hi thil thleng fo a ni a, kum khat chhungin lirthei khalh fimkhur loh vang leh kawng tha tawk lo avanga chetsualna thlengah mi 1,00,000 vel an thi ziah.

Thingtlang lamah phei chuan bus hi inkalpawhna atana an hman ber a ni a, a khalhtute hian himna dan zam an zawm loh bakah a chuang thei zat aia tam an phur nasa thin hle bawk.

Nikum pawh khan hetiang deuh chiah hian Himalaya tlangdunga Uttarakhand-ah inneihnaa kalte phurtu bus chu kawng atanga tlan liamin kawrah a tla lut a, mi 25 lai an thi.