A vawi khat nan Japan-ah chuan mihring cheng zinga 10-a pakhat zel aia tam mah chu kum 80 leh a chung lam an ni.

An ram sorkarin a chhinchhiahnaah mihring cheng maktaduai 125 zinga 29.1% zet chu kum 65 leh a aia upa niin an tam ber lai a ni.

Japan hi khawvel ram zinga nau piang an tlem berna zinga mi a ni a, thalai an tlem a, upa an tam chak bawk si avangin hemi tihziaawm dan tur hi nasa takin an lo ngaihtuah thin.

United Nations chuan tunah hian khawvela ram zinga a mi cheng zat atanga chhuta kum upa an tam berna a ni a, kum 65 leh a chung lam an tam berna a ni tih a sawi.

Italy-ah mi cheng zinga 24.5% chu upa niin Finland-ah 23.6% an ni bawk a, anni hian an dawt a ni.

Kum 2040-ah phei chuan Japan-ah hian kum 65 leh a chung lam hi mi cheng zinga 34.8% zet an tlin tawh an ring tih National Institute of Population & Social Security Research chuan a sawi.

Khawvel ram lian zingah kum upa hna thawk mek ngah ber ram an ni bawk a, hnathawktu zinga 13% chuang zet chu kum 65 leh a chung lam an ni.

Japan bakah hian an thenawm ramah pawh nau piang an tlem thin hle a, Japan hi an tlem zualna a ni nghe nghe.

Nikum chhung khan nau piang thar 8,00,000 pawh an tling lo va, kum zabi 19-naa an chhinchhiah china an tlem ber tum a ni nghe nghe.

Kum 1970 chhovah kha chuan kum khatah nau piang maktaduai hnih chuang an awm thin.

Prime Minister Fumio Kishida chuan January khan an ram chu nau piang an tlem zel avangin khawtlang anga pangngai taka kal an harsat theih thu a lo sawi tawh a. Hetih mek lai hian thuneitute hian ram dang atanga hna thawka lut an duh mang lo.

Asia khawmualpuia ram dangte pawhin Japan ang bawkin an buai.

Nikum khan China-ah chuan kum 1961 hnu lama a vawi khat nan mihring cheng a tlem zawngin an kal a, South Korea pawh khawvela nau piang an tlemna ber a ni bawk.