ZALEN, December 15, 2025: Jharkhand-a 4th UTT National Ranking Table Tennis Championship khelh zawh takah mipa maltanah Jeho Himnakulhpuingheta chuan semi final thlengin Mizoram tan bronze medal a la.

Ranchi khawpuia Harivansh Tana Bhagat Indoor Stadium-a inelna neihah hian tel pawh an tam hle a, senior mens’ singles huangah ringawt bik pawh India hmun hrang hrang atangin player 350 chuang an inlan.

Men’s singles bikah hian Top 16-ten group stage (qualification round) khelh hah ve ngai lovin main draw (Round of 128) lut sa an ni a, Jeho-a pawh hi India-ah No. 14 a nih sa avangin round hmasa ber hi a khel lo.

Mizo tlangval hian round of 64 atanga bul tanin Maharashtra tlangval, Sontakke Anish lakah 3-1-in a chak a, a dawt leh round-ah Maharashtra mi tho, Mudit Dani lakah hnehna chang zui lehin pre quarterfinal a lut.

Quarterfinal luh inchuhnaah hian Bengali Aniket Sen Choudhury lakah 3-0-in hnehna a chang a, a thiam pariat inelnaah Delhi tlangval, Sudhanshu Grover lakah 3-2-a chakin semifinal a lut a. Final luh inchuhnaah hian Delhi mi tho, Payas Jain lakah 0-4 (8-11, 3-11, 11-13, 12-14)-in a chak ta lo a ni.

Jeho-a hian November thla khan Indore, Madhya Pradesh-ah medal a lo la tawh bawk a. Senior level-a medal tum hnih a lakna niin, Mizo player tha thin, Lalrinpuia record a rawn nih rual a ni. 

Mizoram Table Tennis Association (MTTA) chuan Jeho-a’n a zawna semifinal a thleng thei hi amahah inrintawkna nasa tak a siam dawn bakah national player tha rualten an hmuh dan a dang dawn a, a khelh leh zelna turah a tha zawngin a pui dawn a, final a khelh hun hi a thleng har tawh loh an beisei tih an sawi.

Jeho-a hian bronze medal a lak leh tak avang hian a ranking chhuak thar leh turah a san belh leh ngei a rinawm bawk.