ZALEN, February 15, 2026: Indian Weightlifting Federation (IWLF) Youth, Junior leh Senior National Weightlifting Championships neih zawh takah Mizo rit chawi chak pasarih inlante chuan Jeremy Lalrinnunga hovin medal pali an la a, bronze vek a ni.

Modinagar, Uttar Pradesh-a February 2 atanga inelna neih hi Pathianni khan zawh niin Jeremy-a bakah hian David Zohmingmawia, Isak Malsawmtluanga leh David Zohmingmawia ten bronze medal pakhat theuh an la a ni.

India ram pum huap pawha rit chawi chak hriat hlawh ber zinga mi, kum 24 mi, Jeremy-a hi senior huanga kg 65-ah inlanin snatch-ah kg 133-a rit leh clean & jerk-ah kg 162 a chawi a, belhkawma kg 295 chawiin pathumna hi a ni a. Kg 302 chawi thei, Muthupandi Raja, Tamil Nadu leh kg 296 chawitu, Charu Pesi, SSCB chu a tluk pha lo.

Ainawn Veng, Aizawl tlangval, Army Sports Institute (ASI), Pune, Maharashtra-a awm mek, Jeremy-a hi hun eng emaw chen inhliam vanga inelna tak taka ainlan theih loh hnuah a inlan ve leh thei ta a ni.

Yadav Farm House-a ram pum huap inelnaah hian kg 239-a rit chawiin junior-a kg 60 huangah National Centre of Excellence (NCOE), Imphal, Manipur-a awm mek, Isak-a chuan junior kg 60 huangah bronze medal la bawk.

Mi mala langsar ber erawh Isak-a nena Imphal-a awm mek, David-a niin Mizoram tan bronze medal pahnih a la a. Junior-ah kg 110 chuang inelnaah a lak bakah youth-a kg 94 chung lam huangah bronze a la bawk a ni.

Ram pum huap inelnaah hian Mizoram atang hian rit chawi chak pasarih leh anmahni hruaitu mi pahnih an kal a ni.

MIZORAM ATANGA KALTE:

1. Isak Malsawmtluanga, NCOE, Imphal - 60 kg Youth/Junior

2. Laithanpuia, MSSC, Aizawl - 65 kg Youth/Junior/Senior

3. Jeremy Lalrinnunga, ASI, Pune - 65 kg Senior 

4. Lalhunthara, ASI, Pune - 71 kg Senior 

5. Lalfakawma, MSSC, Aizawl - 79 kg Youth/Junior

6. David Lalzawmdika, NCOE, Imphal - 110 kg Junior

7. David Zohmingmawia, NCOE, Imphal + 94/+ 110 Youth/Junior

Coach: Minakshi, NCOE, Imphal

Manager: Lalchhanhima Parte, KIC, Champhai Ruantlang