Hollywood Box Office-a tun hnai chhova movie hit tak, ‘Free Guy’-a a changtunu, Jodie Marie Comer hi March 11, 1993-a piang a ni a. English lemchang thiam a ni.

Hriat a hlawhna ber hi kum 2018 atanga tun thlenga a channa, British drama spy thriller ‘Killing Eve’-a Oksana Astankova/Villanelle-i lema a channa hi a ni mah zawk a. A chan thiam em avang hian Primetime Emmy Award for Outstanding Lead Actress in a Drama Series leh British Academy Television Award-ah  Best Actress chawimawina a lo dawn phah tawh a ni.

Comer-i hian lemchan khawvela hriat a hlawhna dang chu E4 comedy-drama series ‘My Mad Fat Diary’ (2013–2015)-a Chloe Gemell-i lema a chan te, BBC One drama series ‘Doctor Foster’ (2015–2017)-a Kate Parks-i lema a chan te, BBC Three drama miniseries ‘Thirteen’ (2016)-a Ivy Moxam-i lema a chan leh Elizabeth of York lema Starz historical miniseries ‘The White Princess’ (2017) te pawh kha a tel a. Sarah-i lemah Channel 4 television film ‘Help’ (2021)-ah hriat a hlawh mek bawk.

Free Guy-ah hian Millie Rusk/Molotov Girl lemah changin hei hi movie lian pangngaia a inlanna hmasa ber a ni chauh va. He movie hi tunah hian khawvel pumah a hit mek a. Hei bakah hian kumina tihchhuah tho, ‘The Last Duel’-ah Marguerite de Carrouges-i lemah a chang tha hle bawk.

Comer-i hi Liverpool, England-a piang leh sei lian a ni a, a sei lenna tak erawh Liverpool daia Childwall a ni thung a. An veng thenawm, Woolton-a St Julie’s Catholic High School-ah lehkha a zir thin a, hetah hian Olympic athlete lar tak ni ve mek, Katarina Johnson-Thompson nen intawngin tun thlengin thian inkawmngeih tak an la ni zui ta zel nghe nghe.

A naupan lai hian lâm a tui hle thin a, a lâm nasa bawk a; mahse, an sikula an dance group-ah a tel laiin an chhungkaw chawlh hman avanga rehearsal-ah a inlan theih loh avangin bân a ni a; mahse, show-ah hian amahin tha zetin a lam ta tho a ni.

Hemi tuma a lam hian an drama zirtirtu mit a lak phah a, BBC Radio 4-in lemchan an siamah chang tura thlan tur intlarnaah tel ve turin a ti a, hetah hian lo thlangin lemchan lama a inhmanna hmasa ber a tawng ta a ni.

Heta a chanpui hian lemchan lamah theihna sang tak a nei tih hrilhin agent a neih theih nan a pui nasa hle bawk.