Aizawl June 6, 2023 : Aam Aadmi Party Mizoram chuan tun thlenga Sawrkar sikul ten zirlaibu an la dawng kim lo chu hriatthiam a har an tih thu an sawi a, July-ah exam hmachhawn tur an nih tawh laia khawi district mahin lehkhabu an la dawng kim lo chu mak an tih thu leh sawrkar chu education ngaipawimawh tak tak lova an ngai tih an sawi.
    
Mizoram AAP hruaitute chuan sawrkarin lehkhabu zirlai te a pek kim theih loh avangin Governor Hari Babu Kambhampati an hmuh thu an sawi a, Governor hian hma a lakpui angin sawrkar sikul te lehkhabu dawn loh dan te pawh an hriat phah thu an sawi. AAP chuan, "Sawrkar sikul luh a nih atangin thla thum a liam tawh a, July hian first term exam a ni tawh dawn a, tun thlenga sawrkar sikul thenkhatah zirlaibu an la dawngkim lo hi pawi kan ti takzet a ni," an ti.

AAP chuan tunah hian Class VII - Match, Science leh Hindi chu chhut a la ni lo an ti a, school tam tak chuan an zirlai hlui te ta laletin zirtirna kalpui a nih thu an sawi. Tun dinhmunah Free Text Book hi Khawzawl District chu dawng tha ber niin, 96.61% an dawng a, Champhai district chu dawng chhe ber niin 76.25% an dawng a ni.

Sawrkar sikul-a naupang pun chhan chu Covid-19 avanga harsatna tawh vangah leh raltlan an pun vanga an ngaih thu AAP te hian an sawi a, zirchianna an neih atangin 2022 khan sawrkar sikulah naupang an pun laiin 2023-ah hi chuan an tlahniam leh tawh tih an sawi bawk.