YMA VOLLEYBALL: Final-ah champion lai beng tlatu Khawbel leh Hunthar insu dawn

ZALEN, Aug. 11, 2026: LBS Suzuki Avenis 24th Inter Branch YMA Volleyball Tournament 2026 semifinal-ah Khawbel Branch chuan champion lai, Muanna Veng beng tlain Ningani zan final-ah Hunthar Branch nen an inkhel ang.

Thawhlehnia mipa semifinal-ah Khawbel hian champion lai lakah hian 3-1 (25-21, 23-25, 25-23, 25-18)-a hnehna changin final an lut.

Mizoram volleyball inelna sang ber, Pro Volleyball League-a club nei thei branch hi an club player thate nen thawk chhuakin a ball beng thiam veng ni ngar ngar, Muanna Veng lakah hian a tir atangin an chungnung.

Tun lai Mizo spiker tha ber zinga mi, Johan Vanneihsanga’n khelh hmasak lamah beisei pha lo deuh thin mah se Muanna Veng lakah erawh a mawhphurhna a hlen tha a, a hma leh hnung atangin vawi tam a vaw tla a, phu takin Player of the Match atan thlan a ni.

Semifinal hnuhnung zawkah vawi thum champion tawh, Huntharin a thiam veng ni thang tak, Nursery Veng Branch chu 2-1-a an hnufual hnuah lehthalin 3-2 (25-16, 24-26, 16-25, 25-21, 15-12)-in an chak a, champion tam ber ni thei turin rahbi pawimawh an tuk.

Hunthar hian harsa vak lova set hmasa ber an lak hnuah set hnihnaah hnufual hretin tun inelnaa a vawi khat nan set an hloh va. Set thumnaah pawh insiam tha lovin chiang lehzuala Nursery-in set lain 2-1-in hma an hruai hman.

Set linaah erawh Huntharin tawnhriat nei tha an nihna lantirin captain Remsangzuala leh Lalruatfela Sailo thlawptu, Laldampuia Chhangte chuan khelmual ding lam (universal) atangin vawi tam a vaw tla a, an chakna pawimawh niin Player of the Match-ah thlan a ni a, 2-2 nihpuiin deciding set-ah pawh talbuai zui duh tawh lovin vawi li champion ni thei turin kawng dik an zawh.

Thawhlehni vek khan hmeichhe semifinal khelh niin champion lai leh champion ngun ber, Bungkawn Branch chuan 3-0 (25-8, 25-14, 25-18)-a Dinthar Branch hnehin a zawnin final an lut a. Player of the Match F. Lalparmawii’n Bungkawn tan a thawhhlawk hle.

Bungkawn hmaah hian anmahni ang bawka ball beng thiam veng, Dawrpui Vengthar Branch an hmachhawn dawn a. Dawrpui Vengthar hian Luangmual Branch lakah Lalramliani hovin 3-0 (25-16, 25-17, 25-20)-in hnehna an chang a, vawi li champion ni thei turin an inchhawp hnai.

YMA branch inelna volleyball hi kar kal ta Thawhlehni atang khan R.Dengthuama Hall, Mualpui, Aizawlah khelh a ni a. Hmeichhe final hi Nilaini zan hian khelh a ni ang a, mipain Ningani zanah an khel ve thung ang.

MIPA SEMIFINAL RESULTS (Aug. 11, 2026)

Khawbel Branch bt. Muanna Veng Branch

3-1 (25-21, 23-25, 25-23, 25-18)

Player of the Match - Johan Vanneihsanga, Khawbel

Hunthar Branch bt. Nursery Veng Branch

3-2 (25-16, 24-26, 16-25, 25-21, 15-12)

Player of the Match - Laldampuia Chhangte

HMEICHHE SEMIFINAL RESULTS (Aug. 11, 2026)

Bungkawn Branch bt. Dinthar Branch

3-0 (25-8, 25-14, 25-18)

Player of the Match - F. Lalparmawii

Dawrpui Vengthar Branch bt. Luangmual Br