Aizawl: Mizoramah June thla chhung hian Covid-19 vanga thi mi 51 an awm tawh a, June thla chhung vek hian hri kai mi 6692 hmuh a ni tawh bawk a. June 2021 hi Covid-19 hri hmuhchhuah tam ber thla anih bakah thi pawh an tam ber thla a ni bawk.

ZALEN chhinchhiah danin June thla hian Covid-19 hri kai thar hi mi 6692 hmuhchhuah a ni a, hei hi Mizorama hri hmuhchhuah atanga chhutin 35% a tling a, June thla tawpah chuan a sang fal hle tura rin a ni. May thla kalta khan hri vei hi mi 6268 hmuh a ni a, May thla pum aia nimin zing thlenga hri kai hmuh tam zawkna hi 423 a tling a ni. June ni 20,2021 kha ni khat thil thua hrikai hmuhchhuah tam ber ni a ni a, hemi ni hian hrikai 673 hmuh a ni.

June 2021 chhung vek hian Covid-19 vanga thi hi mi 51 an awm bawk a, hei hi Mizoramah Covid-19 vanga thi mi 91 atanga chhutin 56% a tling bawk a ni. Mitthi te hi Aizawl district ah 78--, Champhai 1, Kolasib 5, Serchhip 3, Mamit 2 leh Saitual 2 te an ni a. Hetih lai hian Lunglei, Saiha, Lawngtlai, Khawzawl leh Hnahthial district ah chuan Covid-19 vanga thi an la awm lo thung.

Nimin zinga result tihchhuahah Covid-19 positive thar 232 hmuhchhuah leh a ni. ZMC RT-PCR Laboratory-a sample test 1143 zingah COVID-19 positive 57 hmuhchhuah a ni a. TrueNAT Laboratory-a sample test 90 zingah COVID-19 positive hmuhchhuah a awm  lo va. Rapid Antigen Test hmanga sample test 2801 zingah COVID-19 positive hmuhchhuah thar 175 a awm a ni. Mizoramah positive hmuhtawh mi 19091 zinga 11028 hi mipa an ni a, hmeichhia 8063 an awm bawk. Mizorama Covid-19 vei tihdam zat (recovery rate) chu 76.23% a ni mek.