Justin Bieber khumtu BLACKPINK

Admin - Sep 12, 2021

YouTube-ah subsciber an ngah ber

South Korean girl group BLACKPINK chuan Canadian singer Justin Bieber lehpelin YouTube-a subsciber ngah ber an ni ta a, he thu ziah lai hian subsciber hi maktaduai 65.8 zet an nei. 

YouTube chuan hemi chungchang hi September 10, Zirtawpni khan tarlangin, BLACKPINK chu artist zinga subsciber ngah ber an nih thu an puang. Kum 27 mi Canadia pop star Justin Bieber hi hun eng emaw chen chu subsciber ngah ber a ni a, BLACKPINK te hian an rawn khum ta a ni. Justin Bieber hian subsciber maktaduai 65.1 a nei mek. 

Record an siam chungchangah hian - Jennie, Lisa, Jisoo leh Rosé te chuan thuchhuah an siam a, "A awihawm loh hial zawk! Hei hi BLINKS (fans) ten thilpek hlu tak min pek chu a ni. Hei hi khawvel hmun hrang hranga min thlawp tlattu fans te tan kan hlan e," tiin, fans te vanga record siam thei an nih thu an sawi. 

"Hlawhtlinna kan channa kawngah hian BLINKS ten an thawhhlawk em em a, an hlimpui ve ngei pawh kan ring. Theihtawp kan chhuah tlang zel ang chu..." tiin lamthu sawina an tarlang bawk. 

BLACKPINK an ropui
Member pali awmna BLACKPINK hian June  28, 2016 khan YouTube-ah channel an siam a, kum tam a vei hmain dinhmun ang ber an luah der mai - subsciber ngah ber ni tur hian kum li leh thla thum chiah an mamawh!

Kumin April thla mai khan subsciber hi maktaduai 60-ah an kai chho a, thla hnih hnu lekah Justin Bieber an khum ta a ni. BLACKPINK hian viewer pawh an ngah hle a, 19,395,701,539 zet an nei tawh! 

YouTube-in a tarlan dan chuan BLACKPINK hian kum liam ta chhung khan 9.7 billion views an nei a, an music video pali - Ddu-Du Ddu-Du, Kill This Love, Boombayah leh As If It's Your Last te chuan 1 billion views an kai vek bawk. 

Korean boy band BTS pawh subsciber ngah zingah telin pathumna (57.7 million) an ni a, Marshmello (53.8 million) leh Ariana Grande (49.6) te chu top 5-ah an lang bawk. 

Share now