ZALEN August 29, 2023 : Rajya Sabha MP chuan Mizo Nationalism leh Mizo inpumkhatna tichhe zawnga thu sawi leh ziak te pawh a awm thei a ti a, hemi kawngah hian fimkhur a ngaih thu a sawi a, Nationalism chungchangah PM Modi thusawi pawh a react thin thu leh Mizo nationalist hriatfiahna nia a ngaih te a sawi bawk. 

Vawiina Saikuti Hall Lunglei-a Sports & Youth Services Department leh Mizo Zirlai Pawl buatsaih "Youth 20 Mizoram, Meet on Nationalism, Patriotism & Development" hun hmanna a khuallian Rajya Sabha MP K.Vanlalvena chuan, "Pu Modi-a hi Indian Nationalist nge Hindu Nationalist a nih ka ngaihtuah fo mai. A thusawi tam takah India tih aiah Hindustan tih a hmang thin a. Kei chuan 'Hindustan rama min siam in tum chuan kan tel ve thei dawn lo' tiin ka lo react ve thin a ni," a ti.

K. Vanlavena chuan, "Mizo Nationalism kan tih chuan Mizote hi tu thuhnuaiah mah awm lova, mahnia ro in rela, mahni kea din duh tlatna thinlung hi Mizo Nationalism hrilhfiahnaah ka ngai tlat a. Hei hi ka thinlunga riak reng a ni a, a reh maiin ka ring lo. Engtik niah emaw chuan ram khat niin kan la awmkhawm ang a, eng hmingpuin nge kan la dinchhuah dawn tih erawh chunglam thu thu a ni. Kan insuihkhawma, rorelna pakhat hnuaiah mahnia ro inrela kan awm hi ka beisei tlat a ni," a ti. 

Vena chuan, "Mahni kutkea din tum tlatna Nationalism a awm tih sawiin, kan rama tha duh em em te - buh leh thlai, sangha leh thei te hi tam taka thar turin engatinge kan uar loh? Keimahni, mitin thinlungah Nationalism a len loh vang a ni," a ti. 

K. Vena chuan tumna a awm chuan a tih theih a ti a, Rajya Sabha ah Chairman phalna in vawi 14 thu a sawi tawh a, a phal lo chung chung vawi 2 a sawi tawh bawk tih a sawi. Hei hi chapopui vanga sawilang a nih loh thu sawiin, "kan thinlungah theihna leh tumna a awm tlat chuan kan ti thei mai a ni," a ti.