Mi thil chik miten ngun taka an chhut danin Mizote hi ze nghet nei lo ni-in an sawi thin, kan hnam pum nunphung atanga chhut chuan hei hi a lo dik khawpin a hriat a ni. Tunlai kan thalaite nun leh khawsak phungah ngat phei chuan nun nghet chet chawt leh principle mumal nei lo thalai kan tam tial tial niin a lang. Changkanna suakin kan moral a ei ral mek avangin huho nun kan ngaina tial tial a, changkanna dik pawh turin kan taihmakna leh tawrhchhelna in a tlin lova, dikna vanga tawrh a tul hun pawha tuar ngam leh mal tan ngam, Ka Tlanchhe Dawn Lo ti-a insangphek ngam thalai huaisen kan tlem tial tial ta in a lang. Zoram thalaite hian Moral reforms mai pawh ni tawh lovin, Moral transformation hial kan lo mamawh takzet tawh a ni. John Pymad-an, “Ka ngawih avanga ka ram leh hnamin a tawrh ai chuan ka tawng a vangin keiman ka tuar mai ang e” a tih anga ti ngam Mizo thalaite zingah ka tlem ta tial tial niin lang. Hei hi kan Thalaite tan hian chona lian tak a tling a ni. Tin, thalaite mai pawh ni lo, ram hruaitu leh sakhaw hruaitute zingah pawh an mite thudika hruai ngam leh khalh ngam,huaisen taka zirtirna pe ngam an tlem tial tial a. Mipui tihlawm tum leh mahni dinhmun sawhngheh tum reng reng hian kan hmanhlel hlawm tawh a ni berin a lang ta. Kohhran Upa atan te hian Kohhran mipuite hrual tuma, principle fel tak nei ai chuan mipui lawm zawng leh duhzawng anih phawt chuan tih-a, an thu ang anga awm thin leh Kohhran mipuiin an duh duha an sawpkawi theih, mize zawi zawite hi an tling duh tawh zawk te an ti thin a. Ram hruaituah te pawh hian thil tha tih duh tak takte chuan dinhmun lailum an chang lo tial tialin, policy leh principle nei vak lem lo, awmhmuna pawngpaw tha leh hmawlhte ngila ngilten dinhmun tha an chang leh mai zawk thin niin a lang bawk. Heng zawng zawngte hi ngun taka ngaihtuah chuan kan Zoramah hian khua a var mawlh lo a ni ber. Engtikah tak Zoram khawvar hun thleng ang i maw? Pawlah reng rengte pawh hian a thahnem ngai ngai leh rilru seng nasa nasa te hian beih/elrel leh sawisel an hlawh duh zawkin, chutih laiin engvak mah tih nei lem lo, mi pawi sawi lem lova a hminga hruaitu ni ve chang changte hian mite fak an hlawh duhin hruaitu atan an tling duh phian zawk nite hian a lang tawh a. Hengte hi a chhan chu mipuite hian kan zirlo ni berin a lang a, heng mite hi dem ngawt theih pawh an ni chuanglo. Amaherawhchu, thil tha leh dik kan tih dawn tak tak chuan mi zawng zawng tihlawm sen a ni thin lo. Chuvangin, mi dawihzep deuhte chuan ‘mi tih lungnihlohna anih ai chuan ngawih ka chuh leh mai ang e’ an tih phah fo thin zawk niin a hriat. Chutiang ngaihdan pu thinte avang chuan ramin hma sawn theih loh phah a, kan dinhmun tur ang kan nih theihloh phah fo thin niin a lang. Chuvangin, hmangaihna dika kan Pawl emaw Kohhran emaw Ram emaw kan hmangaih tak tak a nih chuan mahni inphat rala, mi lawmzawng leh tuipui zawng ringawt thlir lova, ‘Heti hian tita ila kan Pawlin emaw kan Kohhranin emaw kan Ramin emaw a thatpui em?” ti-a a mihringa te aia kan awmna hmun dah pawimawh thiamin huaisen taka ke pen ngam hruaitu kan mamawh a ni. Chutiang ti thin miten tun dinhmunah mi mawl leh sual nih hlawh a, nuihzatna leh sawichhiatna tinreng an tawk hrih a nih pawhin engtik hunah emaw chuan mipuiten hmangaihtu diktak hriatchhuah hun an la neih a rinawm. Ram hruaina kawngah pawh kan politician tam takte hi chu an huaisen tawklo niin a lang, chutih laiin vision mumal tak nei lova ram hruai tum Politician pawh an pung zel niin a lang bawk. Ram hruaitu tha chuan vision mumal tak, a tawpa a tlenpui tur ram a thlir pha tur a ni a, chumi thlenpui tur chuan mipuite min hruaiin min zirtir tur a ni. Politician tamtak te hi chu mipuiten an kaihruai zawk niin a lang a, chutiang mi kaihhruaina hnuaiah chuan ram ropui kan thlen a rinawm lem lo. Lalna leh thuneihna ringawt duha ram leh hnam tana thil tha pawh ti ngamlo hi chu ramin a mamawh lova, mipuite pawhin chutiang mi chu kan hnualsuat ngam a hun tawh viau a ni. Dik tak chuan mipui ten duh duha kan kawih hera, thil dik vaklo nia lang pawh kan tih tir mai theih ram hruaitu hi kan rilru chhungril ah kan ngaisang ngailo, kan hmuiin kan fak a, kan thinlungin a nuihzat si thin.