Ka computer sîra ka phone dah chu a rawn ri karh karh a. Ka computer leh ka phone ka in-‘dî’-tir (tethered) avang chuan ka WhatsApp message dawn thar lam chu ka hawi lêm lo.
Mahse, ngaih that zân lohna erawh ka nei. Nichin lawka ka biak, ka thiannu, ka nau kha… a dân ngaitê-in a lunglên hunah message min rawn thawn leh chiang… a ni ngei ang—a khua a sik leh te a nih ngawt loh chuan!
Ka thuziah lai, chanchinbu lama e-mail tur ka thawn zawh chuan ka phone chu ka’n en a. Ka lo rin lâwk ang ngeiin ‘amah’ ngei a ni. Thu tam min rawn thawn lo : ‘Ka û ka lung a lêng êm a ni!’ tih zawng a ni!
‘Ka û, thawnthû min lo hrilh leh la . . . Ka mut a chhuak lutuk a. Ka muhil mai thei si lo a,’ a rawn ti, hmâna thawnthu ka hrilh thin, dam lohna khuma mu mêk ka Nau-i chuan.
Banga sana intâr vá chu ka melh zawk a; tlai lam dâr li leh minute sawm li pali a kâwk mêk. Nî pawn, hmanhmawh êm êmna nei loin khaw thlang lam a pan riai riai a. Tukverh lam ka hawi leh zawk a—khua chu a thiang êm êm mai a. Tlai thli thaw heuh heuh chuan ka pindan tukverh parda chu a rawn chhem lám siau siau mai. Ka piaha tlâng inkham phei pût mai chu a mawi êm êm a; lungtilêng tur khawpin a ni, tlai ni tla tur chuan a èn màwi phût ni!
‘A… thawnthu inhrilh tur chuan ka va hman rih lo ve aw…,’ tih thû ka phone-a chhû a, ‘Send’ ka hmeh hnu lawk chuan, ‘I hman reng tho hi… Hmânah pawh, i lehkhabu-ah thawnthu chi hrang hrang i ziak thin a. Tûnah chuan, i thawnthu ziah leh tura mi, thawnthu thar min hrilh lâwk a ni mai dawn alawm… a bûa i chhuah leh hmain ka hre duh châk a…!’ tiin min rawn reply leh nghal var a. ‘Ka hre duh châk,’ a tih lai chu ka lâwm riau a. Ka tlânchhe ngam ta bîk lo a! Ka phone ta a:
“Aw le, puan sin la. Tûnah khan khawiah nge i awm? Eng nge i thlîr mêk?” tiin bul ka’n tan a.
“Ahhh… kan kawmthlanga ‘Rehloh lui’ i tih thin, luang ri her her reng thin kha ka khum atangin ka thlir mêk a… Ah! Saw… savâ saw a thlâwk leh daih! Min rawn phone vâng a ni ang.”
“A ni ang e… Thîkthu chhe thin an nih chuan, kei hi min thîk zâwk se… ka va’n lâwm dawn tak!” ka ti thla ve ngawt a!
“A nih, thawnthû chu… ka û, sawi tawh la… ” a ti ban chap mai.
“A nih leh aw… Ni tlâk hma ngeia a tâwp a ngai dawn a nia aw…,” ka ti ve ngawt a. Thawnthu sawi tur bera lah chu ka hre mai lo khawp si a!
“Ni e, ni tlâk hma ngei sawn a hàw a ngai dawn a…,” a ti leh a.
“Hmmm… Hmân lai hian maw, nula leh tlangvâl inhmangaih deuh mai hi an awm a…,” ka’n ti fân duai a.
Eng thû nge maw ka sawi leh dâwn ka dàwn lâwk loh avâng chuan, dawn lâwk loh thawnthu sawi chu har ka ti ngang mai si a! Mahse, “Ih… a hmeichhia zâwk, Lucy chuan a thianpa, Garth-a chu a zin bosan dawn a. A zin dawn tlai chuan an khaw daia lui te pakhat, River of Nowhere-ah chuan an inhmu ta a,” ka ti ta a. Engtin nge ka sawi zawm leh ang aw…
“Chû luite kiangah chuan Zirtawpni leh Inrinni tlai tin an thu dûn ziah thin a maw… Tlai ni tla tur chu kâr tin an thlîr liam dûn thin a, tlai thlifîmin an samte chu a chhèm phêtsak siau siau thin a,” ka’n ti leh a. “Ruah a sùr châng chuan, an thut dunna piaha Sasaw thing buk hnuaiah chuanan insawn leh mai thin a, inkai chung zêlin… inthlah a, inhàwsan emaw inkalsan emaw chu an thil hlauh ber a ni thin,” ka tih zawm zat a. “Mahse, tum khat chu…”
“Engtin zêl. Tum khat chu engtin…?” a ti zui zat a.
“Savâ kha a rawn thlâwk leh a maw… a thiannu tihlim tur bawkin a bû-ah chuan a rawn tum chat zêl a. Tin, a hrâm chiap chiap reng thîn. Thawnthu a hrilh ve dân a ni ang tiraw?” ka ti a. “A ni ngei ang, ka û,” tiin min chhawn a. Ka sawi zawm zêl a: “Chu savâ chu, Sava pà a ni a; mahse, a hrisêl lo khawp mai a maw . . . ‘Chuan, a thiannu chu, damlo chung chung chuan a kan thin a. Tlai ni tla thlìrpui atan a duh tlat thin a,” ka ti ta zêl a. Ka tui chho khawp mai a.
“Ngawi rawh lawk, ka û,” tiin ka thusawi lai chu min pawt chat a. “Chû sava pà chu a thi thuai dawn em?” min ti ta khauh mai.
“Thih leh dam thû chu Pathian ruat tur alawm,” tiin ka chhâng a. Chû thawnthu chu ka sawi zawm zêl a; tlai khaw êng dul ruai mai kâra an hlim dun thin dân te, hringnun thawnthu ngaihnawm an tih dun thin dân te leh an pahnih chauha chen reng an thlâkhlelh reng thin dân zawng zawngte nen chuan.
A hnu lawk chuan, ka chau tawngkhawng a ni chék ang chu… nge, ‘ka buai’ ta zâwk?? Chemotherapy min khaina hrui chu ka tâlna lamah ka lo tichat phung mai a lo ni a! Chemotherapy ka khai tih chu ka Naui chuan a hre lo. Min buaipuituten min tiharh dawn chauh… tih a, “Thiannu…,” tia ka au chiam mai chuan, keimah zâwka hi min tiharh hlawl mai a!
Ka sîra ding, tu emaw chuan ka dîl leh ngen angin ka phone chu min lo pe var a. Tunge a nih ka hre lo—a vâr vek si a! “I thiannu message tur chu type rawh le,” min ti!
“Thiannu, ka lung a lêng êm mai! Thawnthû min lo hrilh ve tawh zâwk la…,” tih chu ka type a ni àwm e.
Kei chu, ka sa-ruang chu, hun rei tak chhung ka lo tawrh tawh, cancer natna vei nawn leh ngai reng reng tawh lo turin kuangah an lo zalh mêk a ni! Ka hmu vek! Kei aia kal hmasa zâwk tur riaka ka ngaih thin; thahnemngai taka fuih a, a hlim nana thawnthu mawl leh ho mai mai nia ka hriat, ka lo hrilh ve keuh keuh thin avanga nun hlimna changa la dam zâwk ta fan, ka thiannu chu… vawiin leh naktûk tlaia thawnthu ka hrilh theih dawn tawh loh avang chuan ka tap ta a. Mahse, ka mit atâ mittui erawh a tla thei tawh si lo thung!
Ka ruang chu, ka kuang tura an duan chawpin an zâwn tâ—he leia ka chan awmchhun, lei hnuai feet ruka thûka zalh tur chuan! Chû kuang rawn zuitu zingah chuan, a mittui sûm tum lo ka thiannu, dam la sual ve tâwk tâwk—‘Thianpa…,’ tia koh tur nei tawh lo chu a tel ve! Tû takin thawnthû hrilh zui ang maw aw? A thawnthu ngaihnawm tih a hoh a, a tawi tehlul nena !
Ka hmu reng a: A phone beng-vuahah hlâ a ngaithlâ— kan ngaihthlâk dun thin hla lungkuai tak kha. Chu ri ruai ruai hlâ chuan ka nun erawh a liampui tawh a, ka nun chu a tâwp tawh! Mahse, chu hlâ chuan sawia siak loh ‘nun tam tak’ a her liampui mêk thung a ni!
Na mêk, tawrh nei mêk, belh tur vàna vai mêk tan hian… ka thawnthû sawi kha a va tawi êm—ka that lai khan ka lo sawi teuh lo a aw…!

By - Zirsangkima