MNF chuan ZPM kaihhruai sorkar ni 100 chhunga an tih tur an tiamah hlawhchhamna tam tak hmuh tur awm tawhin beiseina sang tak nena thuneihna petu mipui an tibeidawng mek niin an sawi a. "Kalphung thar an zawrh chuan kalphung hlui an sawi chhiat tam tak pawh a pha lo hleah kan ngai," an ti.

Nilaini khan J.Malsawmzuala Vanchhawng, Vice Chairman, MNF Publicity Board chuan Aizawl Press Club-ah thu thar lakhawmtute kawmin ZPM sorkar chuan ni 110 a tling a, an intiamna tihlawhtling vek turin fir taka teh hun a la nih loh thu a sawi rualin lak luh a nih nia Chief Minister Lalduhoma'n ni 100 chhunga anmahni tehna tur a sawi hmanga tehin hlawhchhamna tam tak a awm tawh a ti a, "Pawi kan ti a, beiseina sang tak nena thuneihna petu mipuite an tibeidawng chho mek hi vanduaithlak kan ti takzet," a ti.

Mipui sorkar ni lovin party sorkar, official-te ring zo lo sorkar sawh ngheh mek nia sawiin J.Sawma chuan, "December 8, 2023-a ni 100 chhunga sorkar hmalakna tur chief minister-in a puan khan Point 6-naah sorkar official-te tel lova sorkar a kal theih loh thu leh dik taka hna an thawh tlan a duh thu a sawi a. Sorkar hmalak tawh dan en erawh chuan ZPM sorkar hian official-te a ngai pawimawh lo mai ni lovin engahmah a ngai lo zawk hial niin a lang ta zawk," a ti.

MNF Publicity Board vice chairman chuan chief minister office atangin governor hmingin committee din tawh hrang hrangah official an tel ngai lo niin a sawi a. State Planning Board, Mizoram State Policy Coordination Committee leh Mizoram Resource Mobilization Committee-ah te chuan member secretary bak official an tel lo va; Mizoram Education Reform Committee-ah phei chuan official pakhat mah an tel lo niin a sawi.

Inthlan hmaa sorkar viltu leh khalhtu, a tul huna khaka minister-te pawh koa zilhtu tur nia an sawi, Val Upa Council hotupa Prof. Thangchungnunga chu planning board member-ah tel ta zawk niin a sawi a, "Hei hi VUC thawm a reh rei ta viau nen pawh hian sawi zawm a remchang hle," a ti.

ZPM sorkarin sorkar hnathawkte tel lova party hruaitute leh an sangawizawnpui, an mi duh zawng an ruat chhuahte nena thutlukna lian an siam zel tur chu sorkar kal zel turah a him lo tak zet niin a sawi a. "Entir dang a nei lo a, Mizoram sorkar official-te an ring tawk lo a, mipui sorkar ni lovin, official-te ring tawk lo sorkar, party sorkar an sawh nghet mek tih a lantir," a ti.