K. Lalrinchhana

Dam reite hi kan thlahlel viau a, thlakhlelh tur pawh a ni reng a. Dam ta na chu upat hun te, tar hun te a lo la thleng ngei awm si a, a huphurh awm lawk mang e.

Naupan lai khan upat thuai thuai a, puitling nih thuai thuai te kha kan chak a, kum te kha kal muang ruihin kan hre thin. Christmas te kha thleng har riauin kan hria a. Christmas kan hmang zo a, kum a lo thar a, christmas leh hun chu hla vawng vawngin kan hre thin. Puitlin hnu erawh chuan ni leh thla te hi an ral zung zung hian a hriat a, Christmas te hi duh ai ai hian a thleng zing ta emaw tih tur a ni. Hriat mang loh karin upat lam kan pan hret hret a, hriat loh karin vanglai hun kan hmang zo mai dawn a lo ni.

Len lai leh that lai hun nuam ti em em thin, thenrual pawl thiam, zai lam ngaina em em Awithangpa pawh khan vanglai hun liam mai tur leh ‘tar’ hun lo thleng mai tur chu a huphurh ve ngawt a sin.

“Kan lenlai no nghil nghiala leng kan chhai, Hai ang tar leh sakhmel chul tur Awithangpa’n, Ka dawn khawl lung reng a awi thei lo”a ti thlawt mai.

Tar hnua kan nun zui zel dan tur hi ngaihtuah ngam pawh a ni mang lo. Vun a lo chuar ang a, khaw hmuh a lo fiah lo ang a, beng hriatna a lo tha lo ang, hriat rengna a lo chak tawh lo ang a, zan mut a har ang a, thawm ri hlekah kan harh fo tawh ang. Kan khua a har vawng vawng ang a, kawm tur kan van pharh tawh ang. Thalaite intihhlimna leh an bengverh thil te chu kan tan ninawm mai an chang tawh ang.

Tar thlenga dam turah inngai ila, tar hun tleng pawha hriselna tha kan neih a, nun hlim zawk kan neih theih nan kan that lai hian nun dan dika kan nun a, kan taksa kan duat thiam a, kan hriselna kan ngaih pawimawh hi a tul hle mai. Vanglai leh hrisel that lai chuan zuk leh hmuam te hian kan taksa hriselnaah nghawng nei lutuk lo hian kan hre thin. Kum inrualpui rau rauah zuk leh hmuam ti nasa chu an kum rualpui te aiin an lang upa hma a, an hrisel lo nge nge bawk. Zuk leh hmuam kan ti nasa lutuk hi kan sim a tha khawp mai. A hnam ang pawha thil zahthlak tak a ni. Kan taksa duat nachang kan hriat loh a, zuk leh hmuam laka kan fihlim duh lo a nih chuan upat hnua kan bawrhsawm ta viau a nih pawhin kan mawh a ni thui khawp ang.

Hriselna ngai pawimawh a, zuk leh hmuam laka fihlim, tuk tin taksa sawizawi a, kea kal thin te chu an upat hnu pawhin an intha zo a, an hrisel a, an ngaihtuahna pawh a fim nge nge bawk. Chung mi te chu kum 80 ral an kai hnu pawhin an la kawm tlak viau mai. Hman ni khan lehkhabu (autobiography) pahnih- ‘Nghilh loh sulhnu’ tih, C.Lalvunga ziah leh ‘Tawn hriat’ tih, V.L.Nghaka ziah te ka lei a, a ngaihnawmin chhiar a manhla khawp mai. Heng lehkhabu ziaktu pahnih te hi kum 90 ral kai tawh ve ve an ni a, C. Lalvunga phei chu kumin hian a kum 93 na a hmang mek a ni. Kum 90 ral kai tawh hnu pawha lehkhabu la ziak fat fat thei hi hnam dang zingah pawh an tam lo mai thei. Heng mi entawntlak pahnih te hian fak an phu ngawt mai. An vanglaiin an nun an uluk a, nun dan dikin an nung tihna a ni. An tawn hriat an ziah te hi a ngaihnawm ngawt mai bawk.

Tar hun tleng pawha nun duhawm zawk kan neih theih nan kan vanglai hian kan nun i uluk ang u.