Aizawl May 1, 2023 : Vawiin khan ZPM chuan chhung inkhawm hun an hmang a, he hunah hian Leader Lalduhoma chuan ZPM-ah mithar lawmluhna hun a hmang a, an chunga thil lo thleng chu Pathian hnathawh nia a hriat thu a sawi.

Mi thar lawmluh paha thusawitu ZPM Leader chuan, “Kan mite hian sawrkarna siam loh an hlau tawh a, tlin ngei an duh ve tawh avangin candidate ruat chungchangah pawh ngaihdan hrang hrang a awm phah lo thei lo. ZPM-ah hian mi thiam leh tha an lo luh reng avangin bial insem chungchangah pawh harsatna pawh kan tawk lo thei lo a ni. An lo la luh belh zel dawn a, ZPM hian party tichaktu tur kaihruaitu tur mi thiam leh mi inpe, ram hmangaihtu a mamawh reng a ni. Mimal tan kan ding lova, kan ram tan Policy-ah kan ding reng dawn a ni. ZPM hi Pathianin min kaihruai a, sawrkar lai pawhin a ngam loh kan ni mek tawh a, nghet takin kan ding a, hmalam kan pan zel ang. Kan chunga lo thleng hi kan tawngtai chhanna, Pathian hnathawh niin kan hria. Kan thatna turin Pathianin ro min relsak zel dawn a ni,” a ti.

Lalduhoma chuan tun hnaia an party-in 2023 inthlanpui awm tura bial viltu a ruat dan chungchang sawifiahin, “Bial viltu tur thlithlaiin hun eng emaw chen atang tawh khan Search Committee din a ni a, an theih ang anga hma an lak hnuah nikum November khan OB te chuan Search Committee te hian bial viltu tur ruat theihna nei rawh se, tiin a rawt a. January 2023-ah hemi chungchangah hian consultation neih niin, bial vil tur chungchangah rawn theih leh rawn ngai nia hriat te kan rawn kim a ni. Hemi hnu hian rawtna awm angin Search Committee-te chu Nomination Committee-ah rin zui nise tiin lungrual takin kan pawm a. Meeting kan neihah a tam zawk duh danin thu tlukna kan siam mai lova, kan zavaia duh tlan, 100% hlirin thutukna kan la siam a ni,” a ti.

ZPM Leader chuan DIET zirtirtute hlawh lak theih loh chungchang sawiin, “District Institute of Educational and Training (DIET) hnathawk Group A leh B ten hlawh an lak theih loh avangin vawiin atangin hna an kal ta lo hi a pawi takzet a, hei hian nasa takin zirna lamah nghawng a neih dawn avangin kan sawrkar hian a rang thei ang berin an harsatna hi chingfel rawh se,” a ti.