ZALEN January 27, 2025 : BJP State Core Group Member Dr. K. Beichhua, MLA chuan, "Chhim tawp atanga Hmar tawp thlenga ka zin kual hian, mi thenkhatin kawng avanga harsatna an sawi chu, ka hnungzang a na, ka sil themthum tihte a ni thin a, nimahsela kan kawngpui vanga ka natna neih erawh chu ka rilru na hi a ni," a ti.

BJP ten karthar inhlanna vawiina a neihah National Highway leh Mizoram kawng chhia chungchang sawiin Dr. K. Beichhua chuan, "National Highway No. 6 kan tlawh khan kawng hi a chhe hle a ni tih kan hria a, hmun thenkhat phei chu kan hma ah motor an tlan chuan kawng kan hmu thei lova, a khu lutuk a ni. Opposition MLA ni mah ila, Sawrkar hi a pawng a taka do ngawt leh sawisel ngawt hi kan tih tur a ni lova,Constructive Opposition MLA ni kan ni a, Mizoram Sawrkar pawh Mizoram hmasawnna tur atan chuan theihtawp chhuah a puih hi kan inhuam a ni," a ti.

Beichhua chuan National Highway kawng dinhmun kan en aṭanga ka rilrua lang chu, "Titanic lawng lian a pil hma khan hmalamah Vur tlang sut tur a awm thu vawi thum lai an hrilh hnu ah pawh, a khalhtu khan a ngaihsak tha duh lova, chhiatna nasa tak a thleng ang khan, Mizoram châk lakna pui ber kawng pawh kan enfiah atanga lang chiang chu reilo te ah Vur sut tur awm ang khan, khulai kawng khu tun ang mai maia an ngaihsak lo a nih chuan, Vur tlang sut ang tho khan Mizoram mipui hian kawngchhiat avangin nasa takin harsatna kan tawk dawn a ni tih a lang chiang a, kan State-a Sawrkar lai mek ZPM Sawrkar kaihhruaina hnuaiah hian kan hma lamah Vur tlang lian kan sut mai hi a hlauhawm a, Warning kan pe duh a, Mizoram mipui te'n harsatna lian zawk kan tawh loh nan khawngaih taka kan thurawn pek hi awih a, hma min lak sak turin kan ngen a ni," a ti.

Beichhua chuan sawi chhuzawmin, "He tih mek lai hian Mipui lam pawh hian ṭhal lai a nih vanga ngawi mai mai lovin, fur laia kan ngaih pawimawh ang aia nasa zawk hialin kawngpui siam ṭhat a nih theih nana Sawrkar au eih turin kan insawm bawk a ni," a ti bawk.