Aizawl May 13, 2024 : Vawiin hian Mizo Hnam Run-ah chhung inkhawm neih a ni a. He hunah hian MNF General Secretary Er Lalrinawma, Ex Minister chuan thusawiin, "SASCI sum crore 223 lai lapse-te kha 'sum lapse a awm lo' tia ZPM-in thuchhuah an siam hnan vek a ni a. Kan MLA ten haichhuak hlauh lo se chuan mipuiin a lapse tih pawh kan hre lovang," a ti.

Er Rinawma chuan, "SASCI sum lapse avang khan Mizoramin sum kan chan ngei ngei tur tam tak kan chán phah a. GST-ah ringawt nuai 2000 chuang Mizoram sum bawma lut tur kan chan a, labour cess-ah tam tak kan chan bawk a, tin hnathawktute inhlawhna tur nuai tam tak a luangral bawk a ni. A uiawm tham tak zet zet a ni," a ti a. "Hei mai bakah hian veng leh khaw hrang hrangin hmasawnna an dawn tur, khelmual, Community hall leh thil dang dang an neih loh phah teuh dawn bawk a ni. A pawi hle," a ti bawk.

Er. Rinawma chuan, "MNF Party hi Mizorama party insawh nghet ber leh ruhrel lian ber kan ni a. Mipuite thlavang hauh turin kan theih tawp kan chhuah zel dawn a. Sawrkar kal dik lo veng tur te, ram mipuite thlamuan turtein theih tawp kan chhuah zel dawn a ni," a ti bawk.

AMC Corporator Chuauzikpuii pawhin he hunah hian thusawiin, "Kan ramah hian e'nge thleng a, kan sawrkar hian e'nge a tih, tihte hi mipuiin kan hre tur a ni a. Politics ngaihven hi a changkang a, khua leh tui ṭha chuan ram inrelbawlna hi kan ngaihtuah ngei ngei tur a ni," a ti.

Zikpuii chuan, "Sawrkar-a tel kher turin party-ah kan awm tur a ni lo a. Khawi party-ah pawh awm ila sawrkar kalphung hi ngun takin kan lo zirin kan lo bihchiang ve tur a ni," a ti bawk.