Aizawl July 3, 2023: Vawiin khan ZPM chuan Party Office-ah chhung inkhawm hun an hmang a, he huna thusawitu B. Lalchhanzova, PAC member chuan, “ZPM hi tobul mumal tak neia indin chho, ram chhung leh pawna Zoram thatna veitute sualchhuah leh tawngtai chhuah a ni a, kan kal dan hi party dang tan hman thiam ve chi a ni lo. Inchhitral ngamna atang lo chuan hman ngam chi a ni lova, keini chuan kan hmang ngam,” a ti.  

B. Lalchhanzova chuan, “August ni 15, 2017-ah ZPM din a ni a, kum sarihna hmel a lo hmu ve ta. Kum 2018-ah khan party pawh la ni hman lovin inthlan kan hmachhawn a, MLA bial 8 ah mipui ten chakna min pe a, Zoram mipuiten ZPM chu party-a in register a nih leh nih loh lam an ngaihtuah lo. Constituency pariatah hnehna min chantir tawp mai a ni. Kawng hrang hrangin ZPM kal lai tih buai tumin ruling party ten min bei a, kan tumah kan chian em avang leh kan hnung leh hmaa awm mipuiten min tawiawm that em avangin kumin 2023 MLA inthlan hmachhawn thei turin mumal taka candidate ni thei tur, rel fel thei hmasa ber party kan lo ni ta hial a ni,” a ti.

Chhanzova chuan, “Kum 2018 inthlanah khan bial tam zawkah ding tur kan inhmu zo meuh lo a, tlawmngaih chhuaha ding kan ni fur mai! Beiseina nen ram tan kan penchhuak a, vawiin thlengin Pathian kaihruaina kan dawng nasa takzet a ni. He party hi tobul mumal tak neia indin chho, Zoram chhung leh pawna Zoram thatna veitute sualchhuah leh an tawngtai chhuah a ni. A danglam em emna chu a indin chhohnaah neitu leh dintu nia inngai kan tam em em a, Zoram pawna Mizote pawhin an vei chhuah niin an hria a, ram vei tawngtai mite pawhin an tawngtai chhuah niin an hria a, ram chhunga thil tha duh langsar lem lova intelkhawm thinte pawhin an besei ruk pawl ding taah an ngai bawk. Congress party leh MNF-ten kum 37 zet an inlalchhawk tawhna ram kan ni a, an thiam ang tawkin hna an thawk tawh a, an thlen theih chin pawh kan hmu fiah tawh viau a, thiam thil thar sawr chhuah tur an nei tawh rih lo a ni,” a ti.

Aizawl East II bial vil mektu ZPM PAC member Chhanzova chuan, “Party inrelbawl dan chungchangah beih kan tawk nasa em em a, Congress leh MNF party ten an party inrelbawl dan atangin min teh a, tlawn rawn tur lal em em mi pakhat an siam thin ang bak chu party inrelbawlnaah awm theiin an ring lo a, ZPM party chu ‘hotu ngah, thu ber pawh awm lo’ min ti. ZPM chuan kan rorel dan phungah ‘thuneihna sem zai’ hi a takin kan hmang ngam a, mi pakhat rorelna angin kan kal ve lo. Kan kal dan hi party dang tan chuan hman thiam ve chi a ni lo ang, inchhitral ngamna atang lo chuan hman ngam chi a ni lo. Keini chuan kan kal dan hi kan hmang ngam a, kan ram tan a tha ber rihin kan hria a, zawngchhang thlak pawh kan ti hle a ni," a ti bawk.