Aizawl April 16, 2024 : Chief Minister Lalduhoma chuan MP(LS) election campaign neiin Tuichang constituency leh Hrangturzo constituency a khaw hrang hrang a tlawh kuala vantlang, inkhawmah thu sawiin an party candidate lo thlang turin a sawm a, ram rorelnnah a tha zawngin thil a thleng zel niin a sawi.

Vantlang inkhawma a thu sawina ah Chief Minister Lalduhoma chuan, "Tunlai hian kan MP candidate hian beih a tawk nasa hle mai a, ram hlui politics zia kan la kalsan thei lo hi a pawi kan ti takzet a ni. Kan candidate hi thil ti sualtu ni lovin thil tisual tu chhui chhuahna atana mi tangkai tak a ni a, a leh a ling a mipui rilru hruai kawi zawnga thil an sawi a pawi em em a ni. Nasa takin a pawl ang leh a mimal angin min bei a, a tuk maia thudik lang leh mai tur leh thu belhchian dawl lo hmanga min beih avanga tun dinhmun thleng thei hi kan ni. Thu dik hi a tlo ber thin a, politics a nih avanga belhchian dawl lo leh dawt hmanga in beih hi tawp tawh se kan duh a ni. Thil dik lo hi sawrkar hian a ngai thei dawn lo va, kan chhui chhuak zel dawn a ni," a ti bawk.

Chief Minister chuan,"Sawrkar angin hmalakna tur kan ngah hle mai a, central lamah pawh project um zui tur tam tak a awm a ni. Chumi ti tur chuan MP kan mamawh a, Mizoram leh India inkar palai tur kan thlang dawn a, state sawrkar nena tha taka thawk dun thei tur ZPM candidate Pu Richard Vanlalhmangaiha hi lo thlang tling ngei turin Zoram mipuite ka sawm che u a ni," a ti.

Ni 100 chhunga thawh tur an duan an tihlawtlin thu pawh sawiin, "Ni za chhunga tih tur kan duang a, chungte chu kan ti hlawhltung thei zel a, kan ruahman aia tam kan thawk hman a ni. Ram inrelbawlna a thil pawimawh tak chu sum a ni. Leiba thahnem tak kan chhawm a, hei hi insawichhiatna a ni lova kan dinhmun dik tak kan sawi mai a ni. Inrenchem turin hma kan ka nghal a, hruaituten hma hruaiin kan facilities dawn tam tak a zatve in kan tihniam nghal a, awmzia thui tak a neiin kan hria a ni. Sum hi puk loh theih loh a ni a, puk phal chinah pawh nasa takin kan in rek bung a ni. Kan Budget te a inren zawngin kan siam a, sum hi dik taka hman chuan a lo in daih theih hle a ni tih kan hria a ni," a ti bawk.

Duha chuan, "Health care bill ba kan ngai pawimawh em em a, damloten harsatna kan tawk nasa hle mai a, bill tang zawng zawng kan clear ta vek mai hi Pathian leh thawktute zar a ni a, kan lawm hle a ni. Kan ram rorelnaah Pathian ram a thleng chho zel niin kan hria a, mipuite nen tha taka thawh ho zel kan duh a, hma kan la dawn chauh a, kan hma lam a eng zel niin kan hria a ni," a ti bawk.