Aizawl: Mizoram Pradesh Congress Committee President Lalsawta chuan, "Kan rawngbawl sak mipuite rethei taka an awm laia ram hruaitute lo hausak viau hi a zahthlak," a ti.

MPCC President Lalsawta leh Vice President Lal Thanzara-te chuan April 1-2, 2022 chhung khan Mamit District an fang a, Mamit, Zawlnuam leh Kawrtethawvenga vantlang inkhawm ah thu sawiin Lalsawta chuan, "Mihring ngai reng hi nasa takin a insiam that theih a, nasa takin a danglam theih. Pathian zara kan sorkar a nih chuan a hma aia tha zawka tura insiam danglam thei miah lote chu kan mamawh dawn reng reng lo. MLA hlawh duhtawk lote hi Congress-a an awm a tul lo a ni," tiin a sawi a.

MPCC Vice President Lal Thanzara pawhin, "Kan sorkar chhung pawh khan kan lo lal rei deuh a ni ang, kan lo chapo a, paihthlakin kan awm ta a ni. Zoram mipuiten khawngaih takin min ngaidam rawh u. Tunah hian sorkar ngawr ngawr hi kan tum a ni lo a, Sorkar tha siam hi kan tum ber a ni," a ti bawk.