Aizawl January 20, 2023: ZPM chuan vawiin khan Friday Political Session an hmang he huna thusawitu Working President K Sapdanga chuan Mizoram sawrkarin sawrkar laipuiin a thlawna buhfai an rawn pek doletna pawh a ti hlei thei lo niin a sawi a, Mipui ten vote hmanga chinfel an tum mek niin a sawi bawk. 

ZPM Working President chuan, “Tun hnaiah buhfai chungchang a ri ring hle a. Covid hri leng a rawn thlen hma khan sawrkar laipui chuan Card Pawl (PHH) nei chhungkaw tan ration buhfai vawi khat lakah mi pakhat tan Kg.5 chin kha cheng thum (Rs 3/-) zelin min khulhtir a. Mi pakhat tan Kg.5 lek hi chu a beitham deuha hriat a nih avangin Mizoram sawrkar chuan mi pakhatah Kg.3 zelin, Kg.1 cheng sawmpanga (Rs 15/-) zel a lei ngaiin min belh thin a ni. Hetih lai hian Card Eng (AAY) chhungkua chuan cheng thum (Rs 3/-) zelin quota an khul thin thung," a ti. 

K Sapdanga chuan, "Covid hripui a lo len khan, sawrkar laipui chuan a ram mite dinhmun hrethiamin, buhfai chu a thlawn thawthangin min rawn pe ta a ni. Tunah hian sawrkar laipui chuan a ram mipuite dinhmun hrethiamin kumin chhung a thlawnin buhfai min pek a tum a. Ration vawikhat lakah Card Pawl (PHH) tan mi pakhatah Kg.5 zel min pe dawn a, Card Eng (AAY) nei tan ration card pakhatah Kg. 35 zel kumin chhung min pe dawn a ni. Mizoram sawrkar chuan tun hnaiah sum lama harsatna a neih avang pawh a ni ang, Card Pawl (PHH) chhungkaw tana mi pakhatah Kg.3 a belh thin chu tihtawp a tum ta mai a; mipui lamah phunna leh sawiselna a tam avangin a thu thlak danglam lehin Kg.3 chu cheng sawmpanga (Rs 15/-) a lei turin ruahmanna a siam leh ta a ni. Kan sawrkar hrawn mek hian sawrkar laipuiin a thlawna buhfai min pek lo doletna tak ngial pawh hi a ti hleithei tawh lo a ni ber,” a ti.

ZPM Working President chuan, “Kan airport neihchhuna zinmite tana bungraw nawrna (trolly) lah hman tlak a lawi awm lovin cement leh balu thiar nan an lo hmang chhe deuh vek mai a, hengte hi ram dang mite lakah kan ram hmai tibaltu niin a mualphothlak hle. Cheng khat hlawh tura OSD to CM tia an chhawr lah a nuamsa thei ang berin an thuam a, tul lovah mipui sum tam tak an khawhral a, heng hi lungawi lo chungin mipuiin kan en liam mek a, vote hmanga dah bo turin kan inbuatsaih mek a ni. Zoram mipui pawhin heng thil thleng zawng zawng hi an hmuh hmaih lova, vote hmanga chinfel an tum mek a ni,” a ti bawk.