Kan hriat theuh angin, kan hmalawk-ah India ram puma Lok Sabha MP thlanna kan nei dawn a, he hun pawimawh takah hian MP thil ti thei leh State tana tangkai tur kan thlan chhuah a pawimawh dawn takzet a, chumi thlang chhuak tur chuan MP nihna dinhmun leh eng ber nge an tih thin tithe pawh kan ngaihtuah tel a tha awm e. MP te hi an pawimawh a, India Ram tana Dan siamtu an ni tih chu kan hre vek awm e. Mahse, mipui in ngaihdan dikhlel deuh kan neih chu, MP te hi duh hun huna Parliament-a ding chhuaka, an duh duh au chhuah pui pawp pawp turah kan ngai thin a, hei hi a dik tawk lo deuh. 'Debate' emaw a awm chang hian Party lian zual deuh, entirnan Congress leh BJP te ang atang chuan thusawi tur bik an in ruat thin a, a duh duh tan sawi ve ngawt chi a nilo a, hun pawh a awm heklo. Tin, Party lian in an thawhpui, Party te deuhte atangin thusawi tura ruat an neih thin chang a awm bawk thin. MP te hian thil engemaw Natural Calamity kan tih ang chi, Khawkheng leh Tui lian ang chi te, State emaw ram pum huap chhiatna ang chi te a lo thlen palh chuan Speaker phalna la hmasa in, Zero-Hour hmanga ding chhuakin thu an sawi thei bawk. Mahse, heng Zero-Hour hi hman a khat em em tih chu kan hre tlang vek awm e. Kan MP te hian Delhi tlang an zuk thlen khuan 'Dan' siam tur chu an ni ngei a, chumi tlukpui thuaka pawimawh Centrala Ministry hrang hrang leh Department hrang hrang-a kan State hmasawnna tur kawng hrang hranga dawr kual te hi a ni awm e. State sorkar in Project leh thil dang pawimawh a tihte Ministry ah emaw a Line Department-ah emaw a thawn thlak hi kan MP-te hian an lo bawhzui in, nasa takin an nawr a. Tichuan, Project hrang hrangte hi a lo hlawhtling ta thin a ni. Chuvangin, tun tum MP kan thlan turah pawh hian kan MP te hi mal tlat ngawih ngawiha, an MP Fund ringawt buaipui tur kan thlang dawn lo tih hria a, State sorkar nena thawk duna, State sorkar in Project a neihte umzuia, bawhzui tur kan thlang dawn tih hria ila, chutiang mi chu tunge tih pawh kan hre tlang vek awm e. Party mumal neilo MP, mahni duh dan dan a che tla tur kan thlang a nih chuan MP Fund thleng hian a kal lohna turah a kal ang tithe a hlauhawm a, Parliament ah phei chuan Independent MP hian engmah chanvo pawimawh a neih a rinawm loh tih hi chiang takin kan hriat a tha awm e. Party lian, entirnan Congress leh BJP ah te chuan an MP te mumal taka khuahkhirh a, enkawlna dan a awm vek a, chu chuan an MP te awm mai mai tur leh an duh dan dana an chetla tur a veng thei a ni. Independent MP kan nei a nih erawh chuan eng Party mahin an Control tak tak dawn lo a. A MP Fund hmanna thleng pawh in a tuar thei dawn a ni tih hi ngun thluk taka chhut nise a lawmawm hle ang. Chumai bakah Independent MP pakhat ve mai chuan State pakhat tan meuh eng kawngah mah eng thil mah a sutkuak tak tak a rinawm loh a, kan State chhungah VIP Light chhi tur, Mizoram tana tangkaina pakhat mah nei silo mi pakhat neih belh ang lek kan ni ang. Tuna kan MP neih mek hi Parliament Committee hrang hrangah dinhmun pawimawh tak tak chelhin a awm mek a, experience a lo neih tawh leh hmelhriat a lo ngah tawhna te hi Mizoram State hian kawng tam takin kan tel tawh a, kan tel mek zel bawkin, kan thlang tling leh anih chuan kan tel leh zel pawh a rinawm bawk a ni. Independent MP lo nei palh ta ila, khawi Committee ah mah a tel pha dawn lo tih a rinawm nghal a. Engtizawng mahin Parliament-ah khuan thusawi na hun pawh a nei dawn heklo. Heng zawng zawng hi ngun taka chhuta, State sorkar nena thawk duna, inzawm tlat tur MP kan mamawh a ni tih hria in, thutlukna mumal tak siam chung leh kan State tana rilru nei ranin Lok Sabha MP thlanna lo awm turah hian mipui ten vote i thlak ang u. - Lalchhuana Renthlei