Aizawl March 16, 2024 : Urban Development & Poverty Alleviation Minister K.Sapdanga chuan, "Tlak huamin hna kan thawk ang, sum hmangin vote kan zawng lovang te kan ti a, kan intiam zul mai a. Zoram mipuiin kan intiamna te kha lo chhinchhiah se, kan thutiama kan din loha, mipui tehnaah kan tlin loh chuan term leh ah chuan min chawlh tir mai rawh se, tih hi kan dinna a ni," a ti.

Lunglei Municipal Council (LMC) in Zirtawpni-a fai lawmman an dawn lawmna Convention Centre, Lunglei a neih a hmanpuinaah he thu hi sawiin UD&PA Minister chuan, "LMC councillor te hi Lunglei khawpui enkawl tura mipui ten kan thlan tlin te anni a, eng emaw avangin kum khat dawn engmah hmanrua nei lo leh hnathawk thei lovin an lo awm tawh a, kan councillor te hi hna thawh chakin, za zek zekin an lo awm tawh a. Mahse tunah chuan hnathawhna tur hmanrua kan lo pek tawh dawn avangin mipui ten eng ang councillor nge kan neih tih kan hre tan tawh dawn a ni," a ti.

LMC a ZPM hlang Councillor an awm chu tha a tih thu sawiin K. Sapdanga chuan, "Zep nak emaw AMC-ah chuan party an in awm pawlh a, hnathawh a rualkhai thei lova, chu chuan harsatna tam tak a siam a. LMC-ah chuan chutiang chu a thleng ve dawn lo a ni. Mi thenkhat chuan hetiang ang sawrkar hi khalh ngiltu an awm loh chuan an kal sual thei a ni, an ti a, mahse kan councillor te hi khalh ngilh pawh an ngaih ka ring lo, State atanga Fund an dawn hma pawha anmahni thawhkhawm atanga mipui tan hna lo thawk duh mai mi an ni tih ka hria," a ti bawk.

UD&PA Minister hian LMC website www.lmclunglei.com chu a tlangzarh bawk.