Chanchin sawi tur ngah ve tak, a thusawi avanga vawi tam tak beih lo tawk tawh thin Kangana Ranaut chuan thu bengverh tak a sawi chhuak leh ta. Kum 34 mi Kangana Ranaut hi tun hnai khan India rama civil mite chawimawina sang Padma Shri hlan a ni a, award a dawn ruala a thusawi erawh mipui helh zawng tak a lo ni hlauh!

Bollywood star Kangana Ranaut hian kum 1947-a India zalenna (Independence) chu sawi nepin, 2014 atanga Narendra Modi kaihhruai sawrkar a din atang chauhin zalenna tak tak a intan chauh niin a sawi a, hei hian sawi zui a hlawh hle a ni. 

A thusawi hi eptu party lam chuan an helh zual hle a, Narendra Modi fakna tawngkam a chhakchhuah bakah India zalenna sawinep tumah an puh a ni. 

Mi tam takin a thusawi an dem thu an tarlang a, Padma Shri an pek pawh la kir leh tura an duh thu an au chhuahpui hial. Zirtawpni khan a chenna in kawtah lungawi lo eng emaw zat an pungkhawm a, pun khawm huaihawttu National Students' Union of India (NSUI) chuan Padma Shri award hi chhuhsak leh an phut thu an tlangaupui a ni. 

Hetih lai hian Kangana Ranaut hian a thusawi avang hian ngaihdam a la dil lo a, amah sawiseltute hi engtin nge a chhan let dawn hriat a chakawm hle.