ZALEN September 25, 2026 : Vawiin khan Home Minister K. Sapdanga chuan sawrkar laipuiin huaisen chawimawina a buatsaih, Uttam Jeevan Raksha Padak dawngtu mi pahnih Joseph Lalnunmawia, Darlawn leh Laldinkimi, Kawlkulh te chu a Office Chamber, MINECO-ah chawimawina award a hlan. 

Home Minister chuan huaisen chawimawina dawng Mizo zinga kan awm zel chu lawmawm a tih thu sawiin, mahni nunna thapa midang nunna chhanhim nana inhlanna chu thil ropui tak a ni a ti a. Hmanlai kan pi leh pute thufing “Thian chhan thih ngam” kan la chhawmnung zel chu lawmawm a tih thu a sawi bawk. 

K. Sapdanga chuan chawimawina chu thil tha tih nena kalkawp tir a pawimawh thu sawiin, chawimawi phute kan chawimawi thin hi hnam anga kan mawina zel a ni a ti a. Inchawimawi tawnna kawngah ke pen zel a tul thu a sawi bawk.

DC Aizawl leh DC Khawzawl atangin chawimawina dawngtute chanchin tawi leh an dawn chhan ngaihthlak a ni a. Joseph Lalnunmawia hian mi paruk kangmei atanga chhanchhuakin Uttam Jeevan Raksha Padak chawimawina hlan a ni a. Laldinkimi hi tui tla a chhanchhuah avangin Jeevan Raksha Padak chawimawina hlan a ni.