DOWNLOAD OUR APP

Read latest news on your phone
app-store

Kangmei lakah fimkhur a pawimawh

Feb 08, 2014

Kangmei lakah fimkhur a pawimawh

Khua a thalin a ro leh tan ta hle mai a, hmun hrang hrangah in kang hriat tur a awm leh ta zeuh zeuh a, ram kang pawh hmun thenkhatah chuan a awm leh tan ta niin a lang a. Kangmei lakah mi tin kan fimkhur zual a pawimawh hle a ni. Chenna In kan chhan tam ber hi kan fimkhur tawkloh vang niin a lang. Khua a thal avangin duhthusam in eng (electric) hman tur kan nei lo a, chhungkaw tam takin bati te kan chhi thin. Heng kan bati leh thildang kan chhit en thin te hian thildang a man kai loh nan fimkhur taka kan dah thin a pawimawh a, tihlum lova mut san mai te, len chhuahsan mai te hian kangmei hlauhawm tak a siam thei a ni tih hriat a tul hle. Mi tam takin In kan chhanah electric short an puh fo mai te hi a dik chiah em le? Thiamthu sawi ve thei tawh lo electric hi kan puh mai a ni em? Kan fimkhur loh thupnan kan hmang mai te hi a ni lo maw? Engpawh nise, In kan sakin uluk taka mi thiamte rawn ngeia ‘wiring’ kan tih that a pawimawh a, chu bakah kan ‘connected load’ zawh tawk chauh power hman thin a pawimawh bawk. ‘Connected load’ aia tam hman a nih hian vanduaina leh buaina lian zawk a thleng thei a ni. Chhungkaw tam takin Ar vulh kan intihhmuh a, mi ram anga hmun danga vulh lovin kan chenna in velah te kan vulh thin. Electric eng chhitsak an ngaih thin avangin hemi kawngah pawh kan fimkhur thar leh a pawimawh a, mahni tana tha tur nia hriat hi lungngaihna thlentu a ni thei tih i hriatreng a pawimawh bawk. Ram kang tamtak pawh hi a chhan lian tak pakhat chu fimkhur tawk loh vang a ni. Lo/huan kan halin uluk takin meikawng sial ni se, ramvak thin te pawhin fimkhur taka ram tikang lo tura mei an chhem thin a pawimawh a. Mei bung leh ram tikang thei te pawh kan paih mai mai tur a ni lo a, kan meichhem te pawh tihmit thin tur a ni. Congress hun hmasa, ST Rualyapa LAD Minister a nih lai khan, ram tikang nasa khuate chu development-ah hrek an nih tur thu a sawi a. Kha khan rah tha a chhuah niin a lang a, chuvangin chhunzawm zel chi a nih a rinawm. Engpawh nise, ram a lo kang palh anih pawhin khua leh tui tha chuan kan thelh zel tur a ni a, hei hi kan duty a ni tih kan hriat a pawimawh a. Thufing chuan ‘Tihdam aiin inven a tha zawk’ a ti a, chuvangin thil pawi a thlen hmaa lo inven hi a hi mi tinte tan lakna tur pawimawh ber chu a ni. Sorkar leh tlawmngai pawlte pawhin tun aia uar zawka kangmei chungchang inzirtir a tul a, kangmei rapthlakzia te, thil a tihpawizia te, a kalsan rapthlakzia te hriat thar leh a tul a, thil pawi zawk a thlen hmaa fimkhur taka chet hi kangmei laka invenna tha ber chu a ni.
Share now