Aizawl; Kumin 2014 chhungin Mizoram ah In kang tum 16 awm tawhin bungrua Rs.2,19,21,000/- hu a kangral tawh a, kangmei vangin mi 2 in nunna an chan tawh. Fire & Emergency Services (F&ES) chhinchhiah danin, nikum 2013 chhung khan Mizoramah kangmei (House fire/Forest fire etc) tum 390 a chhuak a, bungraw kang-ral hlutzawng chu Rs 4,16,65,180/- a ni a, nunna chan mi 3 an awm bawk. Kum 2013 chhunga F&ES-in Mizoram a kangmei chhuah dan record an neih a alan danin, nikum chhung khan In kang 161 awmin, ram kang 186 leh kangmei chhuak dang 43 a awm a, nunna chan mi 3 an awm lai hian, kangmei vanga hliam tuar mi 15 an awm tling bawk. Nikum chhunga kangmei chhuah nasat ber thla chu April ah niin In kang 70 leh ramkang 36 awmin, hemi thla chhung ringawt a bungraw kangral hlut zawng chu Rs 1,06,24,900/- zet a ni a, In kang tam ber thla erawh chu nikum March thla kha a ni thung. Fire department in kumin January atanga 19th February thleng an chhinchhiah danin, kumin chhungin Mizoram-ah kangmei tum 39 (House fire 16, forest fire 8, others 15) chhuak leh tawhin, nunna chan mi 2 an awm leh tawh a, kangmei chhuak vanga hliam tuar mi 2 awm bawkin, hemi hun chhung ringawt a bungraw kangral hlut zawng hi Rs 2,19,21,000/- a tling leh tawh bawk niin thu dawn a ni.