Aizawl: Public Health Engineering department chuan harsatna dang a awm loh chuan kar khat hnu velah dan pangngaia tui pek leh theih an beisei tih an sawi.

PHE department hotute chuan, “Tui kan pump-na phase II-ah kan pump that chuan phase I atan double-a pump tur khawp kan hmu lo a; mahse, tunah chuan a ziaawm leh tawh a. Kar khat hnuah chuan dan pangngaia sem leh theih kan beisei a ni,” tiin ZALEN an hrilh a ni.    

Aizawl khawpui tuia a harsatna chhan sawiin, PHE hotute chuan, “Connection la an tam tawh a, kan tui pump hian a daih tawh lo a ni,” tia sawifiahin, “Kan khawl leh distribution system a hlui tawhin a zo tawh loa, pipe leak vangin tui kan pump chhoh zempuia a luh hmain  hloh a awm a. Heng vang hian 70% bak kan pump thleng thei lo a. Thlak a nih loh chuan harsatna kan nei reng dawn a ni,” an ti. 

Tui pump-na tur power-ah harsatna an tawk tih sawiin PHE hotute chuan, “December, 2020 vel atangin kan duh angin power kan nei mumal thei lo a. Hei mai bakah February-ah kan transformer a chhia a, kan siam that hnuah March thla tawp lama thli leh ruah surin kan tui pump-na line a tichhe leh a, hei hian harsatna min siam nasa hle a ni,” an ti.