Siddaramaiah chu Karnataka chief minister a ni dawn ta a, a thachhangdawltu-ah DK Shivakumar a awm dawn tih Ningani khan Congress chuan a puang ta.

Inrinni kal taa assembly inthlana hnehna an chan hnuah hruaitu pahnih inkarah hian tunge chanvo sang ber chelh dawn tih a chiang lo va, an pahnih hian awm an inti ve ve a; mahse, ni nga hnuah tihfel niin sorkar thar chu Inrinniah lak luh a ni ang.

Congress thupuangtu, Randeep Singh Surjewala chuan kum nga ro an rel turah mi pahnihin thuneihna insem chungchang an zawhna chu, “Thuneihna insem awmzia chu Karnataka mipuite nena insem tihna a ni a, a bak aawm lo,” tiin mi pahnih inkara insem a sawi duh lo.

Hruaitu pahnihte hian tha taka an thawhdun dawn thu an sawi ve ve a. “Karnataka hma lam himna leh mipui thatna tur chu kan ngaih pawimawh ber a ni a, chumi thlen tur chuan kan inpumkhat,” tiin Shivakumar chuan Twitter-ah a tar lang a. Siddaramaiah pawhin, “Kannadiga-te duh zawng vawng turin kan inpumkhat a. Congress party hi chhungkua angin kan thawk dawn,” a ti.

Shivakumar-a hian Congress president hlui, Sonia Gandhi nen an inkawm hnuah No. 2 post-ah lungawiin an party state unit chief a ni chhunzawm dawn nia sawi a ni a. ‘Party thatna tur a inpe’ nia sawi a ni.

Hetih lai hian Congress MP, Shivakumar-a unaupa, DK Suresh chuan NDTV hnenah an ‘lawm lo’ tih a sawi thung a. “Ka unaupa hian chief minister nih a duh a. He thutluknaah hian kan lawm lo,” a ti.

Siddaramaiah leh Shivakumar te hian Ningani tuk khan Congress general secretary KC Venugopal an hmu a. Hei hi thuneihna inchuhna boruak a awm hnua hmaichhana an inhmuhna hmasa ber a ni a. An pahnih hian Congress chief Mallikarjun Kharge an hmu zui leh bawk.

Nilainia Delhi-a an kawmnaah Kharge leh Rahul Gandhi te chuan Shivakumar-a hi an kawm tawh ve ve a; mahse, chanvo sang ber tel lova a chanvo an zawrhte chu a hnawl ve ve nia sawi a ni a. Zan lamah an inkawm leh bawk.

Deputy chief minister tur bakah hian Shivakumar-a hi Siddaramaiah-a kum hnih a chief minister phawt ang a, a bak kum thum ani awm ve turin an thlem bawk nia sawi a ni a; mahse, hruaitu pahnihte hian No. 2 nih hi an duh lo ve ve nia sawi a ni.

Chief minister in nih chhawkah hian thutlukna siam a ni chiah lo va; mahse, Congress hian nakuma inthlanpui thlirin ruahmanna pawh an nei thei nia sawi a ni.

Hruaitu lawk pahnihte inkara thutlukna siam hi a pawimawh hle a. Shivakumar-a hi an state-a huhang na tak, Vokkaliga hnam a ni a. Siddaramaiah lah AHINDA an tih, hnam tlem zawk, Other Backward Class leh Dalit lam thlawp niin Congress vote-tu tam ber an ni.

Shivakumar hian hel lam a rilrua a awm loh thu a lo sawi tawh a. “Party-in an duh chuan mawhphurhna min pe mai a, in pakhat kan ni. Tumah tihdarh ka duh lo va, min duh emaw, duh lo emaw, kei chu mawhphurhna la mai chi ka ni,” a ti.