Congress chuan kar hmasaa Karnataka assembly inthlana hnehna an chan hnuah Inrinni khan sorkar thar lak luh a ni a. Hetah hian cabinet minister tur mi pariat lak luh tel an ni.

Chief minister nih inchuhna a awm hnuah minister tur pawh hnam, ram bial, peng hrang leh hnah hlui leh hnah thar te rualkhai taka telh an ngai.

MLA atana thlan thar zinga Inrinnia minister atana lak luhte hi an chikim hle reng a. G Parameshwara (SC), KH Muniyappa (SC), KJ George (Kristian), MB Patil (Lingayat), Satish Jarkiholi (ST-Valmiki), Priyank Kharge (SC leh AICC President Kharge-a fapa), Ramalinga Reddy (Reddy) leh BZ Zameer Ahmed Khan (Muslim) an ni a. Chief minister atan Siddaramaiah leh deputy chief minister atan state Congress President DK Shivakumar te ruala lak luh an ni.

Cabinet minister atana lakluh turte tifel hian Zirtawpni zan tlai tawh tak thleng khan Siddaramaiah leh Shivakumar te chu Delhi-ah la awmin party hotu liante nen an inrawn.

Sorkar thar hi Governor Thaawarchand Gehlot-a’n Sree Kanteerava Stadium-ah chhun dar 12.30 khan rinawmna thu tiamtirin a la lut a. Kum 2013 khan he hmunah hian Siddaramaiah chu lak luh a lo ni tawh.