February 28, 2024; Power & Electricity minister F. Rodingliana'n tun dinhmunah Mizoram in Kawlphetha leina atana thla khata a sen chu Rs. vbc. 33 atanga 37 a ni tih house a hrilh.

Vawiin Assembly Budget Session ah member te zawhna leh zawhbelhna te chhangin P&E minister chuan, Mizoram sawrkar in Hydro Electric Power Policy tha tak a lo duan tawh zul zuiin, Hydro Electric Project thawh tum te, an power thawhchhuah beisei zat te fel taka ruahmanna nen chak taka hmalak mek a ni tih a sawi.

P&E minister tarlan dain, tunah hian Small Hydro Electric Project - power pe chhuak thei -15 kan nei mek a, an vaia an thar chhuah theih chu 38.55MW a ni. Amaherawhchu, Power a siam chhuah theih zat hi khaw awm dan a zir zelin danglam reng thin a ni. 

Heng Small Hydel Project zinga thenkhat te chu thuam that hna thawh mek an ni. Power tharchhuah kawngah Hydel Project – siam belh tum a hmalak mek a ni a. Chung te chu 1) Tlawng HEP (120MW) Near Lungleng chu Survey & Investigation (S&I) tih mek a ni a, Detail Project Report hi 2024 chhungin zawh hman beisei a ni.

2) Tuivai HEP (150MW) Near Ngopa, 3) Tuirini SHP (24MW) Near Sesawng te hi S&I tihfel tawh a ni a. DPR

pawh peih fel tawh sa a ni. A thawhna tur sum ngaihtuah mek a ni. Solar Power siamchhuah lamah pawh sawrkar chuan theihtawp a chhuah mek a. Tunah hian Grid Connected SPV Power Plant (Solar) 10MWP near Thenzawl Village hna thawh tan mek a ni.

Tun sorkarin power siamchhuah kawnga hmalak chhoh a tum dan te chu :-

1. Thenzawl Solar Plant – 10MWp : Thawh mek a ni.

2. North Vanlaiphai Solar Plant – 20MWp : PPA sign tura hmalak mek a ni. 3. Sumsuih Solar Plant – 5MWp :

State plan atangin thawh tum a ni a, Administrative approval pek chhuah tawh a ni. 4. Keifang Solar Plant – 10MWp : PPA Mizoram Energy Development Agency (MEDA) te nen sign tawh a ni a, hmalak mek a ni.

Memberte zawhbelhna chhangin P&E minister chuan, Mizoram in kawlphetha hnianghnar a nei tura a mamawh zat chu peak hour ah MW 156 a ni tih a sawi.