Aizawl December 16, 2022: Vawiin khan AMC chuan nikhat awh Board of Councillors (BOC) meeting a nei a, meeting hi Lalrinenga Sailo, Aizawl Mayor-in a kaihruai a, ngaihtuah hmanhmawh tur thil a awm avanga neih thin hun pangai aia hmaa meeting neih a nih thu a sawi . AMC area chhunga kawn chei tha zual sawmhnih thlanchhuah hnenah cheng nuai sawm pekchhuah a nih tur thu a sawi.

Aizawl Mayor hnen atangin AMC hmalakna hrang hrang te ngaihthlak a ni a, zawhna leh chhanna hun te neih a nih hnuah Aizawl khawpui enkawlna atana ngaihtuah tur te sawihona hun hman a ni.

BOC thukhawmah hian Building Regulations siam danglam chungchang chu an thu khel lian deuh ber a ni. Sawrkar laipuiin Special Assistance ot States for Capital Investment a pekchhuah nana tih tur a tuk zingah “Modernization of Building Bye-Laws” ngaihpawimawh a ni a, hmalak dan tur sawrkar laipuiin a duan te chu sawiho a nih hnuah AMC Building Regulations-ah telh tura pawm a ni. Him zawkna turin building leh electric hrui inkar zauzawng chu Measures Relating to Safety and Electricity Supply Regulations, 2010 anga kalpui a ni tawh dawn a ni. 

Aizawl-a 5G launch a nih theina tura inbuatsaihna kal mek a tih tur Mizoram Telecom Infrastructure Policy 2020-in kalphung a lo siam tawh  zulzuiin AMC Building Regulations 2012 her danglam a nih theihna tura rawtna chu pawm a ni bawk.

Mizoram Municipalities (Property Tax Management) Rules, 2014-in kum nga (5) dan tala property tax area classification ennawn thin tura a phut angin meeting-ah hian area classification ennawn a ni bawk a ni.

Zemabawk East leh Zemabawk West te Zemabawk Local Council atanga indan an dilna chu uluk taka sawiho a nih hnuah phalsak an ni a, Aizawl khawpui chhungah Local Council 87 a awm dawn ta a ni.