DOWNLOAD OUR APP

Read latest news on your phone
app-store

Khan-a a tawng ve ta! ; Silaimu pali in min fuh

Jan 01, 1970

Pakistani prime minister hlui, Imran Khan chu Zirtawpni zan khan beih a tawh hnuah a vawi khat nan a \awng chhuak ve ta a, Ningania Wazirabad-a kawng zawh a huaihawtnaa truck hnung hawn chunga a ding lai thah tuma an beihnaah hian silaimu paliin a fuh niin a insawi.

Pakistani prime minister hlui, Imran Khan chu Zirtawpni zan khan beih a tawh hnuah a vawi khat nan a tawng chhuak ve ta a, Ningania Wazirabad-a kawng zawh a huaihawtnaa truck hnung hawn chunga a ding lai thah tuma an beihnaah hian silaimu paliin a fuh niin a insawi.

Khan-a hian atana hlauhawm a tamzia a hriat chian phah tih a sawi bawk.

“Wazirabad leh Gujrat inkarah khan khawi laiah emaw min thah tuma ruahmanna a awm tih ka hria a ni,” tiin Khan chuan TV kaltlangin a sawi a, amah hi Lahore-a Shaukat Khanum Hospital-ah a hliam enkawl mek a ni.

Cricketer atanga politician-a inlet ta enkawltu, Dr Faisal Sultan chuan Khan-a ke ding lam x-ray atang chuan a ngal ruh hrawl zawk a chhia a, khi a awm tih a sawi.

“Scan atang chuan a ke ding lama thisen zampui a lang a. Silaimu hian a fuh teuh hle a ni,” a ti bawk.

Khan-a hi Shehbaz Sharif-a sorkarin inthlan a huaihawt thuai nana nawr nan kawng a zawhnaah mi pakhatin Punjab province-a Wazirabad-ah hian truck hnunga an awm lai chu  a kap a ni.

Khan-a hi nawrhlirhah a ke ding lam tuam bur chungin a thu a. TV-a a inlannaah hian sorkar leh sipai hotu liante chu an dik lohna hrang hrang a sawi bawk.

Kah a nih hnu lawkah hian Rawalpindi, Lahore leh Karachi-a mi pungkhawmin kawngpui an dan hnawh darh nan police-in mittui tlaknain an kap a. TV-a lang thenkhatah chuan  lirtheia nawr luh pawh an nei bawk.

Khan-a political party-in kah a nih duh lohna lantirnaa tel thenkhat chuan Lahore-a governor ina luh an tum bawk.

Video clip thehdarh pakhatah chuan lungawi lohna lantirtute hian Pwshawar-a sipai commander-in luh an tum a, sipai tank an suasam bawk tih a lang.

Khan-a hian amah beihnaah hian Prime Minister Sharif, Interior Minister Rana Sanuallah, Major General Faisal Naseer leh Inter-Service Intelligence director general te chu a mawhphurtu an nih thu an inkawmnaah a sawi niin PTI hruaitu, Asad Umar chuan video message a tihchhuahah a sawi.

“Imran Khan-a thah tumna hi Pakistan beihna a ni,” tiin Twitter-ah a tar lang bawk.

KHAN-A'N BEIH A TAWH DAN CHANCHIN

Khan-a hi April thlaa paih thlak a nih hnuah thuneihna a chan leh thuai theih nan inthlan thuai phutin ‘kawng zawh’ (long march) a huaihawt.

Ningania a hote nen Wazirabad an thleng a, a thu sawi ngaithla turin mi tam tak an pungkhawm a. Truck hnung hawn chunga a ding lai chu kah a ni a, a bul hnaiah a thawhpui leh an party mi tam tak an awm bawk.

Vanneihthlak takin pawikhawihna lian lutuk a thlen hmain a titu ber chu an man hman ta hlauh a ni.

“A beitu kan va hmu a, a silaimu a lo kap ruak a, a dang thun a tum leh leh mek laiin a hnung atangin mipa pakhatin a lo man bet a ni,” tiin an party hruaitu pakhat, Mueezuddin chuan a sawi.

Social media-a video thehdarhah chuan a kaptu hian a pistol-in Khan-a awmna lam hi a tin a; mahse, man beh hman a ni.

Mueezuddin-a chuan silai a puah hnuah khan Khan-a leh a bul vela mite chu an awp hniam nghal a, silaiin a fuh pawh khan a chiai lo va, amah vengtuin first aid a pe nghal niin a sawi.

Silai kah tlang theih loh car-ah luhpuiin Lahore-a damdawi in an panpui nghal a ni.

Pakistan prime minister hlui beihna hi amah tantute chuan that tumna nia sawiin ram tam takin an dem thu an sawi bawk.

Beihnaah hian mi pakhat thiin mi dang 10-in hliam an tuar.

Ningani tlaia an hotupa ber beih a nih hnuah hian Pakistan Tehreek-e-Insaf (PTI) chuan Zirtawpni tawngtai hun zawhah ram pumah duh lohna an huaihawt nghal. Party dintu, tuna an ram president ni mek, Arif Alvi chuan ‘rawng taka mi thah tumna’ tiin a sawi a. An ram khawpui, Islamabad-ah chuan sikul chawlh puan a ni.

Khan-an politics-a a epte pawhin beih a tawk chu an dem a, Prime Minister Shehbaz Sharif chuan chiang taka chhui a nih tur thu a puang nghal a ni.

Share now