Aizawl: Khatla South Presbyterian Kohhran chuan an veng chhunga mipui a duh apiang lei theihin buhfaitham an sem.

Tunhnaia thuthang avangin Aizawl khawpuia buhfai chu mipuiin an lei zo duak a, nitin eichawp dap leh mi harsa zawk ten leitur an neih loh avangin Khatla South Kohhran Committee chu Nilai zan khan meeting neiin an huam chhunga mi harsa, an kohhran mi ni kher lo kohhran dang leh hnamdang (vai) te lei theih turin Ningani zing khan buhfaitham hi hralh nise an ti a. Buhfaitham hi chhungkaw 58 in kg 10 theuhin an in lei sem a ni.

Zalen palaiin a biaknaah Khatla South Kohhran Secretary Upa Zohmangaiha chuan, "Kohhran committee chuan kan huam chhungah hian zirlai mi inluah, mi harsa leh vai te an awm nualin kan hria a, heng mite hian buhfai hi a bag in an lei zawh ve loh bakah buhfai lei tur a vang nia kan hriat avangin kan kohhranin thla tin ni 2 leh ni 17 a buhfaitham kan hralh thin chu a mamawh zual te tan hian Ningani ah hralh nise kan ti a. Thleibik awm lovin chhungkaw 58 hnenah kg 10 te te in kan sem a, a leitu ho hi a mamawh tak tak nia kan hriat te an nih avangin kohhran committee pawh kan lawm hle a ni," a ti.

Upa Zohmangaiha chuan tuna buhfai an sem chu ration sem hma a daih theih an beisei nia sawiin tuna an hralh bak buhfaitham chu a sem hun pangngai ni 17 ah an sem theih tawh an beisei niin Zalen palai a hrilh bawk.