Hun hi thil hlu tak a nih avangin a hlutna chu tangka te nena tehkhin a ni fo thin a, a sawifiahna atan hman thin a ni bawk a ni. Mihring kan punga, tunhma ai chuan eizawnna lamah nawrna a na tawh a, mi hnaah an inpe tial tial a. Khawpui a tawt zel bawk a mahse nitina kan thiltih erawh thulh thian a ni bawk si lo a. Heng leh thil dang a ken tel te avang hian nitin mamawh lamkhawm chu thil buaithlak, hna khat tling thei a ni ta hial thin a, nitin mamawh te chu awlsam zawka mipui ban phaka a awm a tul tawh hle a, hei hi Mizoramin kan la tlakchham tak mai a ni.

Mizofed chuan hei hi hriain hma a la chho mek a, petrol pump chu darkar 24 dawr theihin hawn a ni mek a, Pathianni ah chhun dar 12 atanga chawhnu dar 3 thleng hawn a ni thung a, ni pangngaiah chuan darkar 24 dawr theihin an inhawng tawh a ni.

Hetiang ruahmanna kan nei hi thil lawmawm tak a ni a, chhinchhiah tlak a ni hial ang chu. Kan hmunhma te a rem lemloh avangin khawen laia thui tak tak intlar hi thil tih chi a ni tawh lo a, lirthei dang che vel pawh a tibuai thei hial a ni a. Zan rei pawh awm miah loin mahni remchan dan angin petrol pump pan chawt ngam kan nei hi changkanna chi khat a ni phawt mai a, intih hmuh zel theih nise a tha khawpin a hriat a ni.

Mizo sumdawngte inhawn hunchhung hi a rei lo hle a, hnathawh zawh a nih meuh chuan dawr inhawng a awm bar tawh thin lo a. Hunpui chhungin reilote dawr inthurual inhawng rei tih loh chu kum tluanin zan lama pan chawt theih dawr hi kan nei ngai lo tluk a ni a. Mipui lamah chuan ‘awm ve se’ tiin sawi awm thin mahse sumdawng lam zawk hian an dawn thleng hi zauh an tum lemlo ni berin a lang hrih a ni. Hemi lamah hian nitin mamawh lam khawmna dawr kan neih thenkhat te chu an harh deuh tawh niin a lang a, zan rei thlenga inhawng te pawh an awm ve tawh a, mipuiin kan tangkai pui mek chu a ni a. Chutih rualin hetiang dawrkai te inhawng rei ngai thei lo leh hnawk tih rukna hi a ‘veng’ ang zawnga nei an la tam avang hian bituk emaw thunun tumna emaw a la awm thin a. Thil tam takah hmasawnna a thlen leh tangkaina a neih tam zia te thlir loa a hnawkna lai chauh kan thlir thin hi chu a pawi hle a, rilru zau zawk putna tur a la awm a ni.

Mizofed hmalakna ang hian mipui mamawh kawl dawr te hian 24/7 in an sumdawnna hawng thei sela mipui tan awlsamna tam taka thlen rualin hna engnge maw zah a siam a rinawm bawk. Hetiang hawi zawng hian rilru kan siam a hun ta hle mai.