7.4.2022; April 6, 2022, Nilaizan a Chanmari, Aizawl kawngpui dung a bike intlaksiak a tel nia hriat zing a pakhat chu police ten man tawhin, midang chhui zui mek an ni a, he thil thleng chungchangah hian police te chuan thubuai siam ngei an tum tih an sawi.

Thuthar thehdarhtute zawhna chhangin Aizawl SP, C. Lalruaia chuan April 6 zan a kawngpui dung (main road) a bike intlansiak awm chungchang chu zan dar 10:17 bawr vel a thleng a nih thu leh hemi hnu zan dar 10:30 velah police lamin an hriat nghal thu a sawi a, a hmun an thlen chuan bike intlansiak a tel te hi hmuh tur an lo awm tawh lo niin a sawi.

Aizawl SP chuan thil thleng chungchang chu vawiin lamah an bawhzui chhunzawm tih sawiin, he thu buatsaihlai thleng hian mi pakhat man an neih tawh thu leh, an zinga pakhat chuan Aizawl a lo chhuahsan tawh thu a sawi a, theihtawp a an chhui zui zel thu sawiin, thubuai siam ngei an tum thu a sawi.

Bike intlansiak video clip tawite hi social media ah April 6, 2022 zan khan a 'viral' a viewer tam zingah, zanrei pawh a la nih hma leh khawpui chhung hmun lunlai a thil thleng chu mak an tih thu te, awm lo an tih thu te a comment pe an awm nual a, video viral ah hian intlansiak a tel te hi chiang taka hriat theih an ni lo a, mi engzah chiah nge an nih tih pawh fiah fai taka hriat theih a ni lo.