Football mual chhungah chuan  goal thun hi a pawimawh ber avangin goal thun thei player te chu player lar leh hlawh tam ber ber an ni thin. Fans te phurna leh lawmna siamtu ber pawh goal thun hi a ni a, chutih rualin goal thun hi thil awlai tak zawng a ni hauh lo. Game khat chhunga goal thum (hat-trick) thun phei chuan mi vanneih nih mai a tawh lova, player vantlang chung nih a ngai tak zet. Tun tumah hian football history-a goal thun thei mi bik player pang kan rawn tar chhuak dawn a ni. 

5. Klaas-Jan Huntelaar, Mario Gomez, Sergio Aguero - 18 
    Hat-trick siam tam pangana luhtu hi mi pathum lai awmin chung te chu, Klaas-Jan Huntelaar, Mario Gomez leh Sergio Aguero te niin Europe-a khel vek an ni. Anni trio hian hat-trick tum 18 theuh an siam. Kum 37 mi Huntelaar hian Real Madrid, PSV, AC Milan leh Ajax-a a khelh laiin heng hat-trick te hi a siam a, tunah hian Schalke 04 chhuahsanin free agent niin khelhna club nghet a la nei rih lo. 

Mario Gomez-a thung hian hat-trick vawi 18 siam ve tawh bawkin a ni hi Bayern Munich, Wolfsburg, Fiorentina leh Stuttgart tana khel thin a ni. Gomez hian tunah chuan inkhelh chawlhsan tawhin a inkhelh chhungin goal 319 thungin a thiante goal thun tur tum 72 a siam sak bawk. 

Anni pathum zinga chuan Sergio Aguero hi hat-trick siam belh theih ber tur ala ni a, tunah club ropui Barcelona lamah lutin an thiampuipa Messi ber a chhuah tak vangin an rinrawl berah pawh atang chho maithei.

4. Robert Lewandowski - 24

A zawna European Golden Shoe dawng thei ngat Robert Lewandowski hi hnial rual lovin khawvel hmatawng hriam leh goal thun thei ber pakhat chu a ni mek a ni. Bayern Munich hmatawng hian hat-trick 24 siam tawhin club hrang hrang Lech Poznan, Borussia Dortmund leh Bayern Munich tan a khel kual tawh a ni. 

A tun dinhmun leh a theihna en chuan tuna a hat-trick siam bak hi tlem azawng chu siam belh leh thei tura beisei a ni.  

3. Luis Suarez - 29
    Barcelona lamin an hnawlhnu Luis Suarez hi season liam taa a chet dan en chuan theihna sang tak ala nei tih a chiang.  Camp Nou a chhuahsan hnuah  Atletico Madrid lamah kalin La Liga title a lakpui thei a nih kha. Suarez hian goal 21 thunin assist vawi thum a nei a ni. 
    Uruguay hmatawng hi hat-trick siam tam pathumna ni turin tum 29 zet a siam a ni.  Suarez-a chungah hian Lionel Messi leh Cristiano Ronaldo chiah an awm a ni. Tun hmain Barca leh Liverpool tana khel thinin a khelh thinna club ah hian Golden Boot a hlawh chhuak thei ve ve a ni. 

2. Lionel Messi - 54 
    Barcelona captain hlui Lionel Messi hian a career-ah hat-trick vawi 54 siam tawhin siam belh theihna hun tha ala ngah hle bawk. Argentine forward hian hat-trick siam tam lamah mual chhunga a elpui lian ber Ronaldo chu vawi thum chiahin a la phak lo a ni. 
    Player dang lakah Messi hian danglam bikna a nei a, chu chu a hat-trick siam zawng zawng hi a ram Argentina national team bakah chuan club pakhat tan chauha a siam a ni. Mahse, Barcelona hi a chhuahsan tawh dawn avangin hat-trick dang a siam leh a nih chuan club dang tana siam a ni tawh ang.

1. Cristiano Ronaldo - 57
    Juventus ten vanduaina laka an invenna ralthuam pawimawh Cristiano Ronaldo hian hat-trick 57 siam tawh anga record niin football chanchina goal khungtu ropui ber Portugal winger hi hat-trick siam tam list-ah pakhatna niin vawi 57 a siam tawh a, a hat-trick siamna club hrang hrang niin Sporting CP, Manchester United, Real Madrid leh Juventus te an ni. Kum 36 Portuguese international hian tun thlengin goal thun ala chhunzawm zel avangin hei aia tam hi a la siam ngeiin a rinawm.