ZALEN November 15, 2025 : Khawvel huap thil pawh lo buaipui tawh thiamna hrang hrang neite pawh an inrawlhna, kum khat chuang buaipui, Mizo thawnthua dawi thiam hmingthang, Lalruanga chanchin zulzuia siam, 'Lalruanga: The Resurrection' (Thawhlehna) chu Inrinni zan hian Vana Pa Hall, Aizawlah tlangzarh a ni dawn. 

Lalruanga movie producer chuan Mizorama film siam tawhah chuan Computer-Generated Imagery (CGI) leh visual effects (VFX) hman nasat ber pawl a ni dawn tih a sawi a. Heng thiam thil bik khawihtute a thiam ber ber, khawvel huap thil pawh lo khawih fo tawhte niin chan zawha tihchhuah hma hian kum khat vel an khawih a ni.

Movie siam tur hian ziaka hmuh theih piah lamah Mizo chanchin nena inzawmna nei hmunte tlawh a ni a, zir mi leh hnam leh khawsak phunga mi thiam bikte pawh rawn a ni a, rintlak tak tura ngaih a ni.

Lalruanga: The Resurrection hi Mizo hnamzia, thawnthu leh tunlai thiamna mila siam a ni a, Mizo film-a hriat lar hlawh sa tak tak, Rosy Lalramthlengi leh Ruthy Chenkual bakah Pu Dena, Lalawmpuia leh Immanuel-a te pawh an inlan dawn. 

Diffusion G Production kutchhuak movie hi tlangzarh rualin Lersia Play-ah en theiha chhawp chhuah nghal a ni dawn a, streaming platform lamah hian saptawng leh Hindi-in subtitle dah a ni ang.