ZALEN September 27, 2026: Mizoram University a Department of Zoology a Head ni mek Prof. H.T. Lalremsanga leh research scholars te chuan state pawnlam a an thawhpuite nen Mizoram hmun hrang hrang atangin uchang te tak tê, a pianphung, hrâm dan (acoustic analysis) leh DNA te chipchiar tak a an zirchian hnuah uchang species thar a ni tih hmu chhuakin, a hmingah Aizawl hmingchawiin 'Ingerana aizawl' tiin an phuah. He zirchianna hi Mega scientific journal, Zootaxa vol. 5878 chuan September ni 14, 2026 khan a rawn tlangzarh/published ta a ni. 

He uchang species thar hmuhchhuah chungchangah hian Prof. H.T. Lalremsanga chuan, "He uchang Ingerana ang chi hi uchang te tak te te chi an ni a, khawvel pum huapah species 3 chauh hmuh chhuah tawh niin India hmarchhak leh a chhehvelah te chauh awmin tun a kan species thar hmuhchhuah hi Mizoram chhungah pawh hmun hniam lam atanga metre 900 vel a sang, ngaw hnuai luikawr a lung khawkrawk leh khi karah te awm thinin zan lamah chauh chhuak chi an nih avangin hmuh har tak an ni a. Mizoram atang a zirchian a nih tirh khan Arunachal Pradesh a Ingerana borealis nen species rei tak species thuhmun a ngaih a nih hnu ah, data tam zawk leh science thiamna tha zawk nen a zirchian a nih hnu ah species thar hlak a ni tih nemngheh a ni ta a ni. 

Mizoram hmun hrang hrang atanga hmuh ni mahse, Aizawl leh a chhehvel, a bikin Mizoram University campus ami te zirchian nasat bik an nih avangin Aizawl khawpui hmingchawiin 'Ingerana aizawl' tiin a hming hi kan phuah ta a. He uchang species hmuhchhuah thar hian Mizoram hi nungcha leh thlai chi hrang hrangah a hausakzia a ti lang chiang zel a ni," a ti. He uchang species thar hmuhchhuah chungchangah hian research team te hian Forest department chungah lawmthu an sawi nghal bawk a ni.