Aizawl December 16, 2022 : Congress Bhawan 2022 kharna huna thu a sawinaah MPCC General Secretary John Rotluangliana chuan vawiin thlengin corruption case a neih a hriat loh thu a sawi a, Khawzawl Tourist Lodge chungchangah pawisa bo thlau a awm lo thu leh cheng khatmah an eiruk loh thu a sawi bawk.

Tourism Minister hlui John Rotluangliana chuan corruption case a neih a hriat loh thu sawiin, "Vawiin ni thleng hian corruption case ka neih ka la hre lo a, neihna chhan tur pawh ka nei bawk lo. Khawzawl Tourist Lodge chungchang hi 2019 kum tir lam khan Pu. P.C Chuauhnuna, Khawzawl-in Lokayukt-ah FIR a thehlut a, 'Khawzawl Tourist Lodge sakna tur pawisa a bo' tiin. Tichuan, Lokayukta-in ACB te chu chhui turin a ti ta ni. Khawzawl Tourist Lodge hi central atanga PIDDC scheme lo kal hnuaia hna chi hrang hrang thawh zinga pakhat a ni a, he project pumpui hi hna thawh mek a nih laiin central sawrkar atangin tih tawp (delinked) a ni a. Tichuan, NEC leh NEDP-ah te a remchang anga hna chhunzawm sak tura dil a ni. NEDP atangin chhawmdawlna cheng vaibelchhe 3.04 hmuh a ni a, hemi atang hian Khawzawl Tourist Lodge sak zawh nan pawh cheng nuaih 67.49 chu ruahman a ni leh ta a ni," a ti.

John-a chuan, "Hna chhunzawm leh a nih hmain NEC lamin Khawzawl Tourist Lodge sak zawhna tur cheng nuai 67.49 chu an rawn release tur thu kan dawng leh si a, NEDP leh NEC atanga dah double chu a tul lo tiin NEDP atanga kan lo ruahman sa chu PIDDC scheme hnuaia hna thawktu dang te hnenah an hnathawh dan zul zuiin pek a ni ta zawk a ni. NEC atang chuan Khawzawl Tourist Lodge sak zawhna tur cheng 67.49 lakhs chu March 29, 2019 khan sanction hmuh a ni a, NEC sum hmang hian sak zawh a ni ta a ni." a ti.

Sum eiruk a neih loh thu sawiin Tourism Minister hlui chuan, "NEDP pawisa bo ni a sawi cheng 67.49 lakhs chu ACB-ten uluk takin an chhui a, contractor-te pawh a mal mal-in an pawisa dawn zat zawh vek an ni a, office lam atanga pek chhuahna te nen a inmil vek avangin pawisa bo thlau hmuhchhuah pakhat mah a awm lo a, ACB pawhin fel fai takin Lokayukta lamah report an pe tih ka lo hria a, heti chunga kan sawrkarin ACB-te hi an ring zo lo a nih chuan CBI chhui tir ngei turin ka phut tlat a ni. Khawzawl Tourist Lodge sak chungchangah hian pawisa bo thlau pakhat mah a awm lo a, ka director hlui Pu Biakthanmawia nen hian chengkhat mah kan eiru lo a ni tih hi Pathianin min hriatpui a ni. Politics a nih tak avanga thudik leh diklo pawh pawisa lova mimal in tih hmingchhiat tuma inbeih vak mai hi a Kristian lo a, a Mizo lo bawk. Hetiang hi tun hnuah tu chungah mah thleng tawh lo se ka duh a ni," a ti bawk.