Tinreng

Khua leh a hming put chhan

Admin - Mar 28, 2021

kan khua kan hlut ang bawkin heng hmun te hi kan hlut a tul tak zet a ni

Mizote hi khawchhak lam atanga tuna kan awmna Mizorama inbengbel hi kan ni a, kan thlak tlak dan erawh a rual lo hle tih a hriat. Kan khaw hming te ngaihtuah hian Hmar ho hi Mizorama inbengbel hmasa tih khaw hming tam tak atangin a hriat. Chutih rualin kan khaw hming put chhan erawh a khaw hmuna khuanu siam thil danglam tak tak vang te a ni bawk.

Tun hnai khan Mizoram Journalist Association te chuan Lunglei-ah khawmpui an hmang a, chumi pah chuan palai te chu Lunglei khaw hming put chhan Lung-lei hmuh chu tlawhpui an ni a, Lunglei khua a ropui teh lul nen an khaw hming put chhan erawhin ngaihven a hlawh tawk lo tih a lang a, he lei danglam tak, Mizoram khawpui hming put chhan hial ni bawk si hi khualzin tan pawha tlawh nuam tak tur kawng tha tak a nih beisei a nih laiin car  te zawk tan chuan tlan ngamna chi pawh a ni lo hial ang. MJA Lunglei te chuan a kawng hi an theihtawpin an lo thawm tha zawk mah mah.

Aizawl khaw hming put chhan, tuna Governor chenna Raj Bhawan bula lung phun meuha an siam pawh hian enkawl a hlawh lo hle bawk. Tunhnai chho hian Aizawl Mihlun Thlahte ho hian an theih ang tawk chuan an enkawl chho a, chuti chung chuan ngaihlut erawh a hlawh lem lo. Thawhkhat lai phei kha chuan khawlai thianfai thin ten an hmanraw dah khawmna atan an hmang mai thin hial a ni.

Entir nan, Khawbung te, Khawzawl te, Thiak kan tih te hi Hmar hnam ho awmna hmasa a ni a, an hming chawia an khaw hming hi sak a nih avangin an khaw hming put chhan hi han humhalh viau dan pawh a awm lo.

Chutihrualin kan vela hmunhma avanga khaw hming kan sak chhan hmun te hi chu kan humhalh that a tul hle a, kan tih ngei tur ni pawhin a lang a, kan khua kan hlut ang bawkin heng hmun te hi kan hlut a tul tak zet a ni.

Mizote hi kan hmunhlui te humhalh kawngah hian kan harh har hle a, hma kan sawn ta deuh niin a lang a, chutihrualin khawpui lian pahnih pawhin kan hming put chhan hmun kan la hlut tawk lo hle tih han hmuh hian ngaihtuahna a ti thui khawp mai. Aichhe zawl hmunah in a dingkhup tawh a, a chhinchhiahna lung erawh a ding. Lunglei kal tan Lung-lei tlawh loh theih loh ni tawh se....