Aizawl March 10, 2024 : Mizoramah 2022-23 chhung khan khuarel chhiatna vanga nunna chan mi 20 an awm a, leimin (landslide) vanga nunna chan an tam ber.

Tunhnai a tihchhuah Economic Survey Report 2023-24 a tarlan a nih danin, kum 2022-23 chhung khan khuarel chhiatna hrang hrang thleng zingah leimin vanga nunna chan mi 15 an awm a, kangmei vanga nunna chan mi 3 awmin, thlipui tleh vanga nunna chan mi 2, an vaiin mi 20 an awm.

2022-23 ah khan leimin tuar khua leh veng 113 an awm a, Rs. Nuai 114.46 hu tihchhiat a nei anga chhut a ni. Kangmei thlenna khua leh veng 74 awm bawkin mi 3 in nunna an chan a, hemi vanga sum hloh chu Rs. Nuai 168.06 hu anga ngaih a ni. Rial tla tuar khua leh veng 27 awm bawkin, Rs. nuai 16.93 hu tihchhiat a nei anga ngaih a ni.

Cyclone tuar khua leh veng 10 awm bawkin, Rs. Nuai 18.54 hu tihchhiat a nei anga ngaih a ni a. Tuilian tuar khua leh veng 60 awm bawkin, Rs. Nuai 97.49 hu tihchhiat nei anga ngaih a ni. Lirnghing tuar khua leh veng 2 awmin, Rs. Nuai 2.07 hu tihchhiat nei anga ngaih a ni bawk.