Kim Kardashian leh Pete Davidson te chu thla kua an inzui hnuah an inkar hmangaihna thawnthu a tawp ve leh ta - tun atang chuan 'thian' an ni tawh dawn e. Nikum October atanga khan an inzui ta a, an inkar a th chho zel emaw tih laiin awm hran an rel ta zawk a ni. 

Kum 41 mi Kim Kardashian leh Pete Davidson (28) te hi an inkarah kum a tlahnem deuh hlek a, hei erawh an inthen chhen a ni em tih a hriat loh. Khawthlang media thenkhat ten an tarlan dan chuan an hna thilah an buai ve ve a, hei vang hian inkawm hlimna hun pawh an nei meuh lo a, inthen an titlu ta niin an sawi. 

American comedian lar Pete Davidson hian Australia-ah film changin a hun tam zawk a hmag a, hetih lai hian Kim erawh a sumdawnna lamah a buai ve hle bawk. Hengte a nih avang hian an inkar a tha tak tak thei lo a, inhrethiam tak chungin an inthen ta a a ni an tibawk. 

Kim Kardashian leh Kanye West te an inthen hnu lawk khan Pete Davidson leh Kim te hi an in 'date' zui a, a tirah chuan thup ve bawk mah se a hnuah erawh ualau takin an inzui. Pete Davidson hian 'Kim Kardashian' tattoo te a lo chhut tir ve tawh si a, a tih reh ve leh ngei a ngai dawn ta a ni. Hetih lai hian Kim Kardashian hian pasal pathum - Damon Thomas, Kris Humphries leh 
Kanye West te a then tawh thung a, bialpa then tih vel mai mai hi chu a la na lutuk tawh lo mai thei!