Kan thu ngaihtuah tura han chhawp chhuah hi sawi a phurawm rualin ka sawi fiah thiam lo vang tih ka hlau hle. Kohhran leh pawisa han tih ngawt mai chu han ngaihtuah thuak chuan pawisa dik mang lovin a la lut thin tihna pawh a ang thei dawn dawn a. Mahse, pawisa hi dik lo takin a la lut ngai lo tih chu kan hre theuh awm e. Kohhranin a pawisa a hmuhna chu a tlangpuiin miten an pek atangin a ni. Pawisa hi chu pawl lian ber atanga te ber thlengin kan mamawh vek mai, chuvang chuan a lak luhna tha tak kan neih theuh kha a tul hle a ni. Eng emaw chenah kan pawisa neihte pawh a hman dan kan zir a, kan thiam hle a ngai bawk a ni. Kohhran hi sum chungchang thuah hian a la mualpho ngai miah lo tih theih a ni a, chuvang chuan entawn pawh an entawntlak hle mai. Awle, tun tumah chuan pawisa thianghlim lo, kohhran leh pawisain laichinna leh corruption dona lama tha a thawh ve tulnate han tar lan tum dawn ila a tha awm e. Mi tin mai, a te ber atanga a lian ber thleng in pawisa hi kan mamawh theuh a ni. Pawl reng reng a lo din pawhin a mamawh hmasa chu sum bawk a ni. Chutiang bawkin sawrkar pawhin engkim tih leh thawh nan a hmang a ni. Kohhran pawhin a inenkawl nan, rawngbawl zelna atan a mamawhin a tangkaipui em em bawk. Hetiang a nih avangin a thlarau chan nasat lutuk erawh chuan kawng dik lovah min hruai thei a, mi mal chu sawi loh, kohhran leh pawl te pawh min tikhawlo thei hle. Kohhran inenkawlna tur pawisa a mamawh thin a, chu chu Pathian pawhin a remtihpui a ni. Chhung tinte atangin kan thawh chhuah atanga 10%, lawmthu sawi nan kan hlan thin a. Hei bakah sum hmuhna neuh neuh a nei thin bawk. Kohhran thupuan apianga tel ve ziah chu pawisa chung chang - a tuak dan tur emaw hmanna tur emaw a ni, a chang phei chuan rawngbawlna lam aiin a lal zawk emaw ni chu aw, tih theih tur a ni. A ni tak a, kohhran hian pawisa a mamawh em em a, financial campaign hialte a nei thin a ni. Hei vang hi nge ni miin pawisa a sing tel/nuaih tel emaw a rawn donate hlauh mai chuan kar lovah chu mi chu a chhe berah naupang Sanday Sikul zirtirtuah tal an tantir thin. Eng pawh nise, chu mi chu mi pangngai lo lutukte a nih loh chuan kohhran tan chuan lawmthu sawi let nan a tih ve ngei tur chu a ni. Hetiang deuh bawk hian mi tu emaw inkhawm ve tlauh tlauh thinte ai chuan khawi lai SDO emaw thla hnih khat lo inkhawm ve ta khan kohhran beng a verh daih zawk,enga ti nge, kan tih chuan, ani ai kha chuan a thawh hnem thei zawk dawn, mipui pawh a nei zawk dawn. Mahse, hetih lai hian kohhrana mi tangkai tak tak leh thawhhlawk tak takte hi mi awm thei leh officer an ni vek kher lo. Hman deuha Durtlang Pastor biala thawhlawm thawh hnem ber an tih kha Peon hnathawk a ni tlat mai, engati nge, mi hausa pui pui, officer hlawh hnem tak takte an awm nual awm sia, kan ti mai thei. Ni e, a nia lawm; mahse, he mite hian sawm a pahnih an lo pe thin tlat mai, chung lam hi chuan a la bang lam atang hian a tam leh tam loh a lo teh thin. Eng pawh nise, khawvelah hi chuan mi awm thei leh sum nei deuhte an langsar zel thin, mi rethei leh chanhaite erawh an bet tawlh tawlh thin, rorelna ni lo thlen hunah erawh dik takin rorel a ni ang a, a mite chu chatuan lawmnaah a seng lut tawh dawn a ni. Pawisa hrim hrim hi chu engtin mah a danglam thei lo va, amaherawhchu, kan neih dan, kan lak luh dan azirin ngaihdan/pawm dan kan nei thin. Miin a income phu lova in leh lo, ro sum a neih chuan kan rilruah hei chu a hlep ruk (corrupt) a ni ngei ang kan ti thin. A dik ngei a nih chuan a sum leh paite chu thianghlim lo, Setana thil, Pathian tan pawm tlak loh a ni. Miin a zu zawrh/ruihhlo (damdawi) zawrh atanga a sum hmuhte pawh kohhran tan chuan sum pawmtlak loh, dawn loh tur a ni ngei ang. Chutiang bawkin a inzawrhna atang emaw. mi ta a ruk atang emawa a hmuh pawh thianghlim lo a ni ngei ang. Miin thamna a lak emaw a kaihhnawih chihote pawh chung lam thlirna atang chuan pawmtlak loh a ni. Sumdawngte pawh uchuak taka hlepin siam lo tura hrilh an ni a, an zawm loh chuan thuawih lo, mahni duh dana kal, dik lo taka la lut an ni. Heng bakah hian sawrkarin a phal loh pawisa chheprelh (Black Money) kan tihhote pawh hi maichama hlan atan chuan tuman kan duhin ka ring lo, chuvang chuan hengte pawh hi kohhran tan chuan pawm chi a nih loh hmel hle. Hriat ve atana tha nia ka hriat chu, kohhran hi sum avanga awm thei ni lovin, sum leh paite chu kohhran zara lo awm zawk an ni,tih hi. Pathian chu mi rethei a ni lo va, malsawmna chhiar sen lova min vur thintu zawk a ni. Khawvel pawh hian corruption hi chu a buaipui hle a, heng Pakistan, Burma leh Europe ram thenkhatahte pawh hian a hluar hle a, keini ram pawh hi kan nasa hle bawk. Keini ram ngei pawh hi a do nan/tihtlem nan, dan, Lok Ayukta tihte kan siam ve bawk a. Tunah pawh hian sawrkar hian eiruk do nan tihdan chi hrang hrang siamin engkim mai, pawisa telna ang chi chu a kalphung a tihdanglam phah vek a ni. Bible pawh hian a sawi lang ve nual a, Akana chungchang thuah te, Anania te leh Zakaia chungchang thuah te. Keini, Mizo Kristian tha tak tak intite zingah pawh hian a nasa hle. kan C.M zahawm tak pawh khan zahthlak a ti ve hle a ni ang, tum khat kha chu kohhran hruaitute zingah pawh fihlim lo an awm tam thu a sawi. Ram than mawh bawk leh piansualtir theitu a ni a,kohhrante pawh hian kan do a, kan hnualsuat ngam a tul hle mai. Hetih kawngah hian Delhi mipuite hi an ngaihsanawm hlein ka hria, BJP-in hneh taka central-a sawrkarna an siam lain AAP, Delhi sawrkar, eiruk dona dan pass theih loh avanga term hmasaa lo tawp phah ta chu, 100%,deuh thawa chak in an han thlang tling ta riap mai a ni. Heta tanga Delhi mipuite rilru lo lang ta chu eirukna hi an duh lo tak zet a ni, tih hi a ni. Keini ringtu intite, a kohhrante pawh hian Delhi mipuite aia do nasa zawk tur kan nih hi i hre reng ang u. Sawi tawh angin sawrkar hi chuan eirukna hi chu tihrem tumin a bei nasa hle a; mahse, hetih lai hian kohhran lam tan erawh a eiruk a ni ngei em tih kha han finfiah emaw han man chhuah emaw kha a remchang lovin a buaithlak hle ang. Bible pawh hian buh lem leh buh tak chu lo to za mai mai hrih rawh se, a ti a. Tunah rih hi chuan han inthliarhran nghal kha Bible pawh hian a ti lem lo; mahse, nakinah thliar hranna a la neih tur thu erawh min hrilh a ni. Kohhrante kan hlim a, thawhlawmte pawh a pung ngei tur a ni a; mahse, pawisa hian min thunun palh hlauh ang nge, hmeithai rethei pakhatin a a neih chhun dere pakhat a thawh kha thawhlawm thawhho zawng zawng zingah khan Isua mit atang chuan thawh hnem ber a nih kha hre reng ila. Awle, sawi tur dang pawh a la awm zel thei awm e; mahse, lo duh tawk dawn tawh mai ila.