Aizawl: Mizoram Pradesh Congress Committee chuan Kohhran zahawmna vawnghim turin Congress party in sawrkarna a siam leh a ngai tih an sawi. Nimin khan Aizawl Press Club-ah Press mite kawmin MPCC thupuangtu Lallianchhunga chuan, “Kumin 2018 MLA inthlanpui kan hmachhawn meka Congress party-in kan do ber chu BJP leh NEDA a a thawhpui MNF party a ni a; MNF hi BJP-in an ‘Vahte’ tiin JV Hluna chuan a ‘FB wall’ ah a tar a. Kumin MLA inthlanpui hi tisa leh thlarau indona a ni ber tawh,” tiin a sawi. “MNF a sawrkar chuan Kohhran rawngbawltu te’n pulpit tlang atangin Hindutwa Movement leh BJP sawrkar hnuaia ‘Krismas ni te Good Governance Day’ a min puansak te, kan ‘Good Friday te Digital Day’ a min puansak te hi an sawi ngam tawh dawn lo va; chuvangin, Kohhran zahawmna venhim a nih theih nan Congress Party in sawrkarna a siam leh ngei angai a ni,” a ti bawk. Lallianchhunga chuan, “Kum 2008 atanga 2018 chhung hian Congress sawrkar Minister zingah eiruk thubuai nei pakhatmah an awm lo va, a awm thei tur awm deuh chu Pathianin min thuah fai sak a, heng mite hian Congress party an chhuahsan vek tawh a ni," tiin "ZPM hian Politics tuinu pawh an hmang nasa hle, an pawl hi Kohhranho aiawh leh Kohhranin political party dang aia thlawp bik riau ang a inlan tirin, Politics ngaihven ve tak tak lo leh dai thuk ve lo Kohhran rawngbawltu, a bik takin Kohhran Upa te bulah party dang candidate te aia fel tur leh la enchhin ve ngai loh angin lem an chang thin a ni,” a ti bawk.